APMC Rajkot Market Yard Update: રાજકોટ માર્કેટયાર્ડમાં આજે બુધવારે વિવિધ કૃષિ જણસીઓની મોટા પ્રમાણમાં આવક નોંધાઈ હતી. માર્કેટયાર્ડમાં અંદાજે 1,000થી વધુ વાહનો વિવિધ કૃષિ જણસીઓ ભરીને પહોંચ્યાં હતાં. જેમાં સોયાબીન, કપાસ, ઘઉં, ચણા, જીરું, તલ, લસણ સહિતની જણસીઓની આવક થઈ હતી. ખેડૂતો દ્વારા વેચાણ માટે લાવવામાં આવેલી જણસીઓના વાહનોને માર્કેટયાર્ડમાં ક્રમવાર પ્રવેશ આપી ઉતરાઈની વ્યવસ્થા કરવામાં આવી હતી.
જણસીઓની આવકના આંકડા
માર્કેટયાર્ડમાં નોંધાયેલી આવકના આંકડા મુજબ, સોયાબીનની સૌથી વધુ 1,80,000 મણ આવક નોંધાઈ હતી. જ્યારે કપાસની 9,000 મણ, સિંગફાડા/દાણાની 9,200 મણ અને ચણાની 9,500 મણ આવક થઈ હતી. આ ઉપરાંત ઘઉંની 7,500 મણ, સફેદ તલની 6,500 મણ, લસણની 4,500 મણ અને જીરુંની 4,800 મણ આવક નોંધાઈ હતી.
અન્ય જણસીઓમાં કાળા તલની 2,000 મણ, અડદની 3,300 મણ અને વટાણાની 3,300 મણ આવક થઈ હતી. મગફળીની આવક નિરંક દર્શાવવામાં આવી હતી. આ ઉપરાંત માર્કેટયાર્ડમાં એરંડા, કલોંજી, તુવેર, મેથી, ધાણા સહિતની વિવિધ જણસીઓ પણ વેચાણ માટે આવી હતી.
વાહનોને ક્રમવાર પ્રવેશ અપાયો
મોટી સંખ્યામાં વાહનોની આવકને ધ્યાનમાં રાખીને માર્કેટયાર્ડમાં જણસીઓની ઉતરાઈ વ્યવસ્થિત રીતે થાય અને ખેડૂતોને કોઈ અગવડ ન પડે તે માટે વાહનોને ક્રમવાર પ્રવેશ આપવામાં આવ્યો હતો. માર્કેટયાર્ડના ચેરમેન જયેશભાઈ બોઘરા, વાઇસ ચેરમેન તથા ડિરેક્ટરો સહિતના સ્ટાફ દ્વારા સમગ્ર ઉતરાઈ વ્યવસ્થાનું સંચાલન કરવામાં આવ્યું હતું.
આમ, રાજકોટ માર્કેટયાર્ડમાં વિવિધ કૃષિ જણસીઓની નોંધપાત્ર આવક સાથે વેપાર પ્રવૃત્તિ ચાલુ રહી હતી. ખેડૂતો દ્વારા લાવવામાં આવેલી જણસીઓના વ્યવસ્થિત ઉતરાણ માટે માર્કેટયાર્ડ તંત્ર દ્વારા આયોજનબદ્ધ કામગીરી હાથ ધરવામાં આવી હતી.