PM Swamitva Yojana Gujarat: કેન્દ્ર અને રાજ્ય સરકારના સંયુક્ત પ્રયાસોથી ગ્રામીણ વિસ્તારોના સર્વાંગી વિકાસ માટે ચલાવવામાં આવી રહેલી ‘પ્રધાનમંત્રી સ્વામિત્વ યોજના’ (PM SVAMITVA Scheme) ના બીજા તબક્કામાં ગુજરાતે સમગ્ર દેશમાં નવો ઈતિહાસ રચ્યો છે. ડિજિટલ સશક્તિકરણ અને ગ્રામીણ નાગરિકોને પોતાની મિલકતનું સાચું કાનૂની સ્વામિત્વ આપવામાં ગુજરાત દેશભરમાં પ્રથમ ક્રમે આવ્યું છે. ભારતમાં બનેલા કુલ પ્રોપર્ટી કાર્ડના 50 ટકાથી વધુ કાર્ડ એકલા ગુજરાતમાં તૈયાર કરીને રાજ્ય સરકારે અપ્રતિમ સિદ્ધિ હાંસલ કરી છે.
પીએમ મોદીનું વિઝન અને 12 વર્ષનું ગ્રામીણ સશક્તિકરણ
વડાપ્રધાન મોદીના સક્ષમ નેતૃત્વ હેઠળ છેલ્લા 12 વર્ષોમાં કેન્દ્ર સરકારે ગ્રામીણ ભારતને સ્વનિર્ભર બનાવવા માટે અનેક ઐતિહાસિક અને સીમાચિહ્નરૂપ નિર્ણયો લીધા છે. આ યોજનાઓ પૈકીની સૌથી મહત્વકાંક્ષી પહેલ એટલે ‘પ્રધાનમંત્રી સ્વામિત્વ યોજના’. આ યોજનાનો મુખ્ય ઉદ્દેશ્ય ગામડાઓમાં રહેતા લોકોને તેમની જમીન અને મિલકતના કાનૂની દસ્તાવેજો (પ્રોપર્ટી કાર્ડ) આપીને વિવિધ યોજનાકીય આર્થિક લાભો સુનિશ્ચિત કરવાનો છે. આ કાનૂની અધિકાર મળવાથી ગ્રામીણ પરિવારોમાં આર્થિક સુરક્ષા અને આત્મવિશ્વાસનો નવો સંચાર થયો છે.
મુખ્યમંત્રીના દિશાદર્શનમાં ગુજરાતે રચ્યો રેકોર્ડ
ગુજરાતમાં મુખ્યમંત્રી ભૂપેન્દ્રભાઈ પટેલના સબળ દિશાદર્શન હેઠળ આ યોજનાને અગ્રતા આપીને ઝડપી અમલીકરણ કરવામાં આવ્યું છે. રાજ્યમાં આધુનિક ટેકનોલોજીનો ઉપયોગ કરીને અત્યાર સુધીમાં 14,900 ડ્રોન ફ્લાઇટ્સ દ્વારા 11,511 ગામોનું અત્યંત સચોટ મૅપિંગ (નકશા નિર્માણ) અને પ્રમોલગેશનની પ્રક્રિયા પૂર્ણ કરવામાં આવી છે.
આ સચોટ મૅપિંગના આધારે ગુજરાતમાં રેકોર્ડબ્રેક 18.50 લાખથી વધુ પ્રોપર્ટી કાર્ડ તૈયાર કરી દેવામાં આવ્યા છે. આ આંકડો એટલો મોટો છે કે તે સમગ્ર દેશમાં બનેલા કુલ પ્રોપર્ટી કાર્ડના અડધાથી વધુ (50%+) હિસ્સો ધરાવે છે, જે દર્શાવે છે કે આ ગેમ ચેન્જર યોજનાના અમલીકરણમાં ગુજરાત અન્ય રાજ્યો કરતાં ઘણું આગળ છે.
₹50 લાખ સુધીની બેન્ક લોનની સુવિધા
આ પ્રોપર્ટી કાર્ડ માત્ર એક સરકારી કાગળ નથી, પરંતુ ગ્રામીણ નાગરિકો માટે આર્થિક સમૃદ્ધિની ચાવી સાબિત થઈ રહ્યા છે. મિલકતનું અધિકૃત પ્રોપર્ટી કાર્ડ મળવાના કારણે હવે ગ્રામીણ નાગરિકો પોતાની જમીન કે ઘર પર ₹50 લાખ સુધીની બેન્ક લોન મેળવવા માટે સક્ષમ બન્યા છે.
આ લોન સુવિધાને કારણે:
- ગ્રામીણ નાગરિકો પોતાના વ્યવસાય કે ખેતીને વિસ્તારી શકશે.
- ગામડાઓમાં સ્થાનિક સ્તરે રોજગારીની નવી તકો ઊભી થશે.
- નાણાકીય છેતરપિંડી અને જમીન વિવાદોમાં મોટો ઘટાડો આવશે.
- બેન્કિંગ સિસ્ટમ સાથે જોડાવાથી ગ્રામીણ અર્થવ્યવસ્થા મજબૂત બનશે.
- ડિજિટલ અને આત્મનિર્ભર ભારતનું સપનું સાકાર
અત્યાર સુધી ગામડાઓમાં મિલકતના પાકા કાનૂની દસ્તાવેજોના અભાવે લોકોને અનેક મુશ્કેલીઓનો સામનો કરવો પડતો હતો. પરંતુ સ્વામિત્વ યોજનાના ડિજિટલ મૅપિંગ અને પ્રોપર્ટી કાર્ડના વિતરણથી ગ્રામીણ જનજીવન વધુ સરળ બન્યું છે. ગુજરાત સરકારની આ તેજ ગતિની કામગીરીથી વડાપ્રધાન નરેન્દ્ર મોદીનું 'ડિજિટલ અને આત્મનિર્ભર ગ્રામીણ ભારત' નું વિઝન સાચા અર્થમાં જમીની સ્તરે સાકાર થઈ રહ્યું છે.