Gujarat Government DA Hike: દિવાળીના પવિત્ર તહેવારો પૂર્વે રાજ્ય સરકારના કર્મયોગીઓ અને પેન્શનરોના હિતમાં મુખ્યમંત્રી ભૂપેન્દ્ર પટેલે એક અત્યંત મહત્વપૂર્ણ નિર્ણય લીધો છે. રાજ્ય સરકારના પ્રવક્તા મંત્રી જીતુભાઈ વાઘાણીએ મંત્રીમંડળની બેઠકમાં લેવાયેલા આ નિર્ણય અંગે વિગતો આપતાં જણાવ્યું હતું કે, રાજ્ય સરકારના કર્મચારીઓના મોંઘવારી ભથ્થામાં કેન્દ્ર સરકારના ધોરણે 3 ટકાનો વધારો કરવાનો નિર્ણય કરવામાં આવ્યો છે. સરકારના આ પગલાથી લાખો પરિવારોમાં ખુશીની લહેર છવાઈ ગઈ છે.
9.69 લાખ કર્મચારીઓ અને પેન્શનરોને મળશે સીધો લાભ
મંત્રીશ્રીએ વિગતો આપતાં જણાવ્યું હતું કે, મોંઘવારી ભથ્થામાં આ વધારાનો લાભ તારીખ 1 જુલાઈ, 2026થી અમલી બનશે. છઠ્ઠા તેમજ સાતમા પગાર પંચનો લાભ મેળવતા રાજ્ય સેવાના, પંચાયત સેવાના તથા અન્ય સંસ્થાઓના કુલ 4.62 લાખ કર્મયોગીઓ અને અંદાજે 5.07 લાખ જેટલા નિવૃત્ત કર્મચારીઓ મળીને કુલ 9.69 લાખથી વધુ પરિવારોને આ નિર્ણયનો સીધો આર્થિક ફાયદો થશે.
નવેમ્બરના પગાર સાથે 4 માસનું એરિયર્સ ચૂકવાશે
તહેવારોની ઉજવણી વધુ આનંદદાયક બને તે માટે જુલાઈ-2026થી ઓક્ટોબર-2026 સુધીના 4 માસની તફાવતની રકમ એક જ હપ્તામાં ચૂકવવામાં આવશે. આ એરિયર્સની રકમ નવેમ્બર-2026ના પગાર સાથે કર્મચારીઓ અને પેન્શનરોના ખાતામાં જમા કરી દેવામાં આવશે, જેનાથી તહેવારી ખર્ચમાં મોટી રાહત મળશે.
સરકાર પર વાર્ષિક રૂ. 1569 કરોડનું નાણાકીય ભારણ
પ્રવક્તા મંત્રીશ્રીએ વધુમાં ઉમેર્યું હતું કે, કર્મચારીઓને 4 માસના એરિયર્સ પેટે રાજ્ય સરકાર કુલ મળીને રૂ. 523 કરોડની ચૂકવણી કરશે. આ ઉપરાંત, મોંઘવારી ભથ્થામાં વધારાના કારણે રાજ્ય સરકાર પર વાર્ષિક રૂપિયા 1569 કરોડનું વધારાનું નાણાકીય ભારણ રહેશે. આમ છતાં, કર્મચારી કલ્યાણને સર્વોચ્ચે રાખીને આ નિર્ણય લેવાયો છે.
રાજ્યના ગુડ ગવર્નન્સ અને સુશાસનમાં રાત-દિન સમર્પિત ભાવથી સેવા આપતા કર્મયોગીઓની સુખાકારી અને તેમના તહેવારોનો આનંદ બેવડાય તે માટે મુખ્યમંત્રી શ્રી ભૂપેન્દ્ર પટેલની સરકાર હંમેશાં કટિબદ્ધ રહી છે.