Navratri 2026: આગામી નવરાત્રી પર્વને ધ્યાનમાં રાખીને ગરબા રસિકો માટે એક ઉત્સાહજનક સમાચાર સામે આવ્યા છે. અમદાવાદ જિલ્લા યુવા વિકાસ અધિકારી દ્વારા આ વર્ષે ખાસ જિલ્લા કક્ષાની નવરાત્રી રાસ-ગરબા સ્પર્ધાનું ભવ્ય આયોજન કરવામાં આવ્યું છે, જેના માટે તંત્ર દ્વારા તૈયારીઓ શરૂ કરી દેવામાં આવી છે.
સ્પર્ધાના પ્રકાર અને વયમર્યાદા
અમદાવાદ ગ્રામ્ય અને શહેર કક્ષાએ યોજાનારી આ રોમાંચક સ્પર્ધામાં કલાકારો પોતાની પ્રતિભા બતાવી શકશે. આ સ્પર્ધાને મુખ્યત્વે ત્રણ વિભાગોમાં વહેંચવામાં આવી છે-
- પ્રાચીન ગરબા સ્પર્ધા: જેમાં 14 થી 35 વર્ષની વયમર્યાદાના સ્પર્ધકો ભાગ લઈ શકશે.
- અર્વાચીન ગરબા સ્પર્ધા: જેમાં પણ 14 થી 35 વર્ષના યુવાઓ પોતાની કળા પ્રદર્શિત કરી શકશે.
- રાસ સ્પર્ધા: આ વિભાગમાં 14 થી 40 વર્ષ સુધીના સ્પર્ધકો ભાગ લઈ શકશે.
ટીમનું માળખું અને નિયમો
આ સ્પર્ધામાં ભાગ લેવા માટે ગ્રૂપ પર આધારિત નિયમો નક્કી કરવામાં આવ્યા છે. કોઈ પણ સંલગ્ન ટીમમાં ઓછામાં ઓછા 12 અને વધુમાં વધુ 16 સ્પર્ધકો રહેશે. આ ઉપરાંત, 4 સહાયકો મળીને કુલ 20 સભ્યોની ટીમ બનાવી શકાશે.
ફોર્મ મેળવવાનું સ્થળ અને સંપર્ક વિગતો
આ સ્પર્ધામાં ઉત્સાહપૂર્વક ભાગ લેવા ઈચ્છુક ગરબા રસિકો અને કલાકારોએ નિયત નમૂનાનું ફોર્મ મેળવીને જમા કરાવવાનું રહેશે.
ફોર્મ મેળવવાનું સરનામું: જિલ્લા યુવા અને સાંસ્કૃતિક પ્રવૃત્તિઓની કચેરી, એ.એમ.સી. સબ ઝોન ઓફિસ (ઉત્તર પશ્ચિમ ઝોન), પ્રથમ માળ, ઝાયડસ કેન્સર હોસ્પિટલ પાસે, થલતેજ, અમદાવાદ.
વધુ માહિતી માટે સંપર્ક નંબરો-
- મિનળબા પરમાર - 9409605297
- શૈલેષકુમાર ચૌધરી - 9909551031
- ચિરાગકુમાર ઠાકોર - 9265862406
ફોર્મ જમા કરાવવાની અંતિમ તારીખ
સ્પર્ધામાં ભાગ લેવા માટે રાસ રસિકોએ નિયત નમૂનાનું ફોર્મ ભરીને તારીખ 13 ઓક્ટોબરના રોજ સાંજે 6:00 વાગ્યા સુધીમાં ઉપર જણાવેલી કચેરી ખાતે પરત મોકલી આપવાનું રહેશે. જિલ્લા યુવા વિકાસ અધિકારીશ્રીની અખબારી યાદીમાં ગરબા પ્રેમી યુવાઓને આ તકનો મહત્તમ લાભ લેવા અનુરોધ કરવામાં આવ્યો છે.