Chhota Udepur News: છોટાઉદેપુર જિલ્લાના પાવીજેતપુર તાલુકાના સટુન ગામ નજીક આવેલા સુખી ડેમના પાણીમાંથી એક સગીર યુવક અને સગીર યુવતીના મૃતદેહ મળી આવતાં સમગ્ર પંથકમાં ભારે ચકચાર મચી જવા પામી છે. પ્રાથમિક માહિતી અનુસાર, આ બંને સગીરોએ કદવાલ વિસ્તારના એક જ ગામના રહેવાસી હતા અને બે દિવસ પહેલાં ડેમના પાણીમાં કૂદી પડ્યા હોવાની આશંકા વ્યક્ત કરવામાં આવી હતી, ત્યારથી તંત્ર દ્વારા તેમની સઘન શોધખોળ હાથ ધરવામાં આવી હતી.
સગીર પ્રેમી યુગલનો મૃતદેહ ડેમમાં મળ્યો
પ્રાપ્ત વિગતો મુજબ, સગીર અને સગીરા ગુમ થયા બાદ સ્થાનિક તંત્ર અને છોટાઉદેપુર ફાયર વિભાગની મદદ લેવામાં આવી હતી. ફાયર વિભાગની ટીમો દ્વારા છેલ્લા બે દિવસથી ડેમના ઊંડા પાણીમાં બંનેની ભાળ મેળવવા માટે સતત રેસ્ક્યુ ઓપરેશન ચલાવવામાં આવી રહ્યું હતું. દરમિયાન, આજે વહેલી સવારે સર્ચ ઓપરેશન દરમિયાન ડેમના પાણીમાંથી બંનેના મૃતદેહ મળી આવ્યા હતા.
એકબીજાના બાહુપાશમાં હતા મૃતદેહ
સૌથી દુ:ખદ બાબત એ છે કે પ્રાથમિક અહેવાલો મુજબ બંનેના મૃતદેહ એકબીજાની નજીક અને અત્યંત ભાવનાત્મક સ્થિતિમાં બાહુપાશમાં લપેટાયેલા જોવા મળ્યા હતા, જેને જોઈને સ્થળ પર હાજર સૌ કોઈની આંખો ભીની થઈ ગઈ હતી. ઘટનાની ગંભીરતાને ધ્યાનમાં રાખીને કદવાલ પોલીસ સ્ટેશનનો કાફલો તાત્કાલિક ઘટનાસ્થળે દોડી આવ્યો હતો. પોલીસે બંને મૃતદેહોનો કબ્જો મેળવીને આગળની કાયદેસરની કાર્યવાહી હાથ ધરી છે.
કયા કારણોસર લીધું આત્મઘાતી પગલુ?
આ સગીરોએ કયા સંજોગોમાં આ પગલું ભર્યું, તેઓ પોતાના ઘરથી ડેમ સુધી કેવી રીતે પહોંચ્યા અને આ કરુણ ઘટના પાછળના ચોક્કસ કારણો શું હતા. તે અંગે પોલીસે ઊંડાણપૂર્વક તપાસ શરૂ કરી છે. મૃતદેહોને પોસ્ટમોર્ટમ અર્થે મોકલી આપવામાં આવ્યા છે અને રિપોર્ટ તેમજ સત્તાવાર તપાસના તારણો આવ્યા બાદ જ મોતના સાચા કારણો પરથી પડદો ઉંચકાશે.
બંનેના મોતથી પરિવારમાં શોકનો માહોલ
આ આત્મઘાતી કે રહસ્યમય કરુણ ઘટનાને પગલે મૃતક બંને સગીરોના પરિવારજનોમાં આક્રંદ છવાઈ ગયો છે અને સમગ્ર ગામમાં શોકનું મોજું ફરી વળ્યું છે. નાની વયે જ બે યુવાન જિંદગીઓનો અંત આવી જતાં સ્થાનિક અગ્રણીઓ અને પરિવારોમાં ભારે હૈયાવરાળ જોવા મળી રહી છે. આ ઘટનાએ ફરી એકવાર યુવા પેઢીની માનસિક સ્થિતિ, કટોકટીના સમયે કાઉન્સેલિંગ અને તેમની સલામતીના પ્રશ્નોને ગંભીરતાથી વિચારવા મજબૂર કર્યા છે. હાલ પોલીસ દ્વારા આ મામલે વિવિધ પાસાઓ પર સઘન તપાસ કરવામાં આવી રહી છે.