Gujarat Breaking News Live: મુખ્યમંત્રી ભૂપેન્દ્ર પટેલ આજે વલસાડમાં, વિકાસકાર્યોના લોકાર્પણ અને જનસંવાદ સહિતના વિવિધ કાર્યક્રમો યોજાશે

ગુજરાતના મુખ્યમંત્રી ભૂપેન્દ્ર પટેલ વલસાડ જિલ્લાના પ્રવાસે આવી પહોંચશે, જ્યાં તેઓ વલસાડ અને વાપી ખાતે આયોજિત વિવિધ વિકાસલક્ષી અને સામાજિક કાર્યક્રમોમાં સહભાગી થશે. આ પ્રવાસ દરમિયાન મુખ્યમંત્રીના હસ્તે વલસાડ જિલ્લા પંચાયતના નવનિર્મિત ભવન તેમજ વાપીમાં અદ્યતન હોસ્પિટલનું લોકાર્પણ કરવામાં આવશે. આ ઉપરાંત, તેઓ વાપી ઇન્ડસ્ટ્રીઝ એસોસિએશન (VIA) હોલ ખાતે સ્થાનિક નાગરિકો અને અગ્રણીઓ સાથે સીધો સંવાદ સાધશે તેમજ વલસાડના નંદાવાલા ગામે યોજાનાર ધાર્મિક કાર્યક્રમમાં ઉપસ્થિત રહી દર્શન-પૂજનનો લાભ લેશે.

અમદાવાદમાં મેટ્રો પ્રોજેક્ટના બાંધકામના કામને કારણે સાબરમતીથી વટવા સુધીના પાયાભૂત માર્ગનું કામ તેમજ મેટ્રો લાઇનના બાંધકામની કામગીરી હાથ ધરવામાં આવી રહી છે. આ કામગીરી દરમિયાન ચીમનભાઈ પટેલ બ્રિજ ઉપર રેલિંગ અને બ્રિજ મજબૂત કરવાની કામગીરી હાથ ધરવામાં આવનાર હોવાથી વાહનવ્યવહાર માટે ટ્રાફિક ડાયવર્ઝન જાહેર કરવામાં આવ્યું છે. આ કામગીરી દરમિયાન તા. 3 નવેમ્બર, 2026ના રોજ રાત્રે 12:00 વાગ્યાથી સવારે 5:00 વાગ્યા સુધી તથા તા. 4 નવેમ્બર, 2026ના રોજ રાત્રે 12:00 વાગ્યાથી સવારે 5:00 વાગ્યા સુધી ચીમનભાઈ પટેલ બ્રિજ ઉપર તમામ પ્રકારના વાહનો માટે અવરજવર બંધ રહેશે. આ સમયગાળા દરમિયાન વાહનચાલકોએ વૈકલ્પિક માર્ગોનો ઉપયોગ કરવાનો રહેશે.