AMC Heritage Route Cleanliness Drive: અમદાવાદ શહેરની ઓળખ અને ઐતિહાસિક વારસા સમાન હેરીટેજ રૂટ પર સ્વચ્છતા જાળવી રાખવા માટે અમદાવાદ મ્યુનિસિપલ કોર્પોરેશન (AMC)ના મધ્ય ઝોન સોલિડ વેસ્ટ મેનેજમેન્ટ વિભાગ દ્વારા એક અનોખી અને સરાહનીય ઝુંબેશ હાથ ધરવામાં આવી હતી. 3 ઓગસ્ટથી 9 ઓગસ્ટ, 2026 દરમિયાન સફાઈ માર્શલોએ સમગ્ર હેરીટેજ રૂટ પર સતત પેટ્રોલિંગ કરીને શિસ્ત અને જાગરૂકતાનો સુંદર સમન્વય દર્શાવ્યો હતો.
ઝુંબેશ દરમિયાન AMCની મુખ્ય કામગીરી
કડક કાર્યવાહી અને દંડ: સ્વચ્છતાના નિયમોનો ભંગ કરનારા જુદા જુદા એકમોને 27 નોટિસ પાઠવવામાં આવી હતી અને સ્થળ પર જ ₹94,100/- નો વહીવટી ચાર્જ વસૂલ કરાયો હતો.
પ્લાસ્ટિક મુક્ત અભિયાન: પર્યાવરણને નુકસાન પહોંચાડતા પ્રતિબંધિત પ્લાસ્ટિકનો વપરાશ કરનારાઓ પાસેથી ₹5,500/- નો ચાર્જ લેવામાં આવ્યો હતો.
સંપર્ક અને સમજાવટ: તંત્રનો આશય માત્ર દંડ કરવાનો નહીં પરંતુ લોકોની માનસિકતા બદલવાનો હતો. આથી સફાઈ માર્શલોએ રૂટ પરના 170 જેટલા વેપારીઓ અને એકમોનો રૂબરૂ સંપર્ક કરી ડસ્ટબિન રાખવા અને કચરાનો યોગ્ય નિકાલ કરવા પ્રેરિત કર્યા હતા.
ડેપ્યુટી મ્યુનિસિપલ કમિશનર (મધ્ય ઝોન) દ્વારા સ્પષ્ટ કરવામાં આવ્યું છે કે ભારતની પ્રથમ હેરિટેજ સિટીની ગરિમા જાળવી રાખવા માટે આવનારા દિવસોમાં પણ આવી કામગીરી ચાલુ રહેશે. તંત્રએ તમામ નાગરિકો, વેપારીઓ અને સહેલાણીઓને અમદાવાદને સ્વચ્છ રાખવાના આ મહાઅભિયાનમાં સહયોગ આપવા અપીલ કરી છે.