શરણદીપ સોસાયટીમાં દેખાયો હતો દીપડો
પ્રાપ્ત માહિતી અનુસાર, ગઈકાલે મોડી રાત્રે ઘુમા વિસ્તારની શરણદીપ સોસાયટીમાં દીપડો ઘૂસી જતા સ્થાનિક લોકોમાં ભારે ભય અને ફફડાટ ફેલાઈ ગયો છે. સોસાયટીમાં દીપડો જોવા મળતા રહીશોએ તાત્કાલિક વહીવટી તંત્રનો સંપર્ક કર્યો હતો. રહીશોની સુરક્ષા સુનિશ્ચિત કરવા અને વન્યજીવને સુરક્ષિત રીતે રેસ્ક્યુ કરવા માટે તંત્ર એક્શનમાં આવ્યું છે.
દીપડાને પકડવા માટે સઘન ઓપરેશન શરૂ
હાલમાં ઘુમા અને તેની આસપાસના વિસ્તારોમાં વન વિભાગ અને કાંકરિયા પ્રાણી સંગ્રહાલય ટીમ દ્વારા દીપડાને પકડવા માટેની કામગીરી શરૂ કરી દેવામાં આવી છે. દીપડાના મૂવમેન્ટને ટ્રેસ કરવા માટે CCTV ફૂટેજની પણ ચકાસણી કરવામાં આવી રહી છે. વહીવટી તંત્ર દ્વારા લોકોને સાવચેત રહેવા અપીલ કરવામાં આવી રહી છે.
આ ઘટના અંગે અમદાવાદના મેયર હિતેશ બારોટે પુષ્ટિ આપતા જણાવ્યુ કે, ઘુમા ગામ નજીક રાત્રીના સમયે દીપડો આવી ગયો હોવાની જાણ સોસાયટીના સ્થાનિક રહીશો દ્વારા કરવામાં આવી હતી. આ મામલાની ગંભીરતાને ધ્યાનમાં રાખીને તાત્કાલિક વન વિભાગ તેમજ કાંકરિયા પ્રાણી સંગ્રહાલયના ઉચ્ચ અધિકારીઓને આ વિશે માહિતગાર કરવામાં આવ્યા છે.