Ahmedabad Epidemic: ચોમાસા દરમિયાન અમદાવાદ શહેરમાં વાયરલ ફીવર, ડેન્ગ્યુ, સ્વાઈન ફ્લૂ અને મચ્છરજન્ય રોગચાળો ફાટી નીકળ્યો છે. શહેરની બે મોટી સરકારી હોસ્પિટલ અસારવા સિવિલ અને સોલા સિવિલ હોસ્પિટલની OPD માં એક જ સપ્તાહમાં 45,797 દર્દીઓ સારવાર લેવા માટે ઉમટી પડ્યા છે. જેમાં અસારવા સિવિલ હોસ્પિટલમાં 30,044 અને સોલા સિવિલ હોસ્પિટલમાં 15,753 દર્દીઓ નોંધાયા છે.
ડેન્ગ્યુના 370 કેસ, સ્વાઈન ફ્લૂના 9 પોઝિટિવ દર્દી
અમદાવાદની સોલા સિવિલ હોસ્પિટલમાં એક સપ્તાહમાં 1,549 દર્દીઓને અને અસારવા સિવિલ હોસ્પિટલમાં 2,628 દર્દીઓને દાખલ કરીને સારવાર આપવામાં આવી છે. આ ઉપરાંત શહેરમાં મચ્છરજન્ય અને વાયરલ રોગચાળાના આંકડા ચિંતાજનક રીતે વધી રહ્યા છે:
ડેન્ગ્યુ: શહેરની બંને હોસ્પિટલમાં ડેન્ગ્યુના કુલ 370 કેસ નોંધાયા છે. અસારવા સિવિલમાં સપ્ટેમ્બરના પ્રથમ 16 દિવસમાં જ ડેન્ગ્યુના 156 નવા કેસ આવ્યા, જે ઓગસ્ટ મહિનામાં 94 હતા. જ્યારે સોલા સિવિલમાં એક સપ્તાહમાં ડેન્ગ્યુના 552 શંકાસ્પદ દર્દીમાંથી 214 દર્દીઓના રિપોર્ટ પોઝિટિવ આવ્યા છે.
સ્વાઈન ફ્લૂ: સોલા સિવિલ હોસ્પિટલમાં એક સપ્તાહમાં સ્વાઈન ફ્લૂના 85 શંકાસ્પદ દર્દીઓને સારવાર આપવામાં આવી, જેમાંથી 9 દર્દીના રિપોર્ટ પોઝિટિવ આવ્યા છે. જ્યારે અસારવા સિવિલ હોસ્પિટલમાં સ્વાઈન ફ્લૂના 2 સ્ટેબલ દર્દીઓ સારવાર હેઠળ છે, જે પૈકી એક દર્દીને ઓક્સિજનના સહારે રાખવામાં આવ્યો છે.
અસારવા સિવિલ OPDમાં નોંધાયેલા દર્દીઓ
| કેસ | ઓગસ્ટ | 1-16 સપ્ટેમ્બર |
|---|---|---|
| ડેન્ગ્યુ | 94 | 156 |
| હિપેટાઈટિસ | 194 | 73 |
| વાયરલ ફીવર | 700 | 420 |
| સાદો મેલેરિયા | 43 | 20 |
| ઝેરી મેલેરિયા | 13 | 09 |
| ચિકન ગુનિયા | 10 | 17 |
સોલા સિવિલમાં નોંધાયેલા સપ્તાહના કેસ
| કેસ | શંકાસ્પદ કેસ | પોઝિટિવ કેસ |
|---|---|---|
| ડેન્ગ્યુ | 552 | 214 |
| સ્વાઈન ફ્લુ | 85 | 09 |
| મેલેરિયા | 1321 | 18 |
| ચિકન ગુનિયા | 16 | 01 |
અસારવા સિવિલમાં દોઢ માસમાં વાયરલના 1,120 કેસ
અસારવા સિવિલ હોસ્પિટલના સુપરિન્ટેન્ડન્ટ ડૉ. રાકેશ જોષીએ જણાવ્યું હતું કે, ઓગસ્ટ મહિનામાં વાયરલ ફિવરના 700 દર્દીઓ હતા, જ્યારે સપ્ટેમ્બરના 16 દિવસમાં જ નવા 420 દર્દીઓને સારવાર આપવામાં આવી છે. આમ, દોઢ માસમાં કુલ 1,120 કેસ નોંધાયા છે.
મેલેરિયા અને ઝેરી મેલેરિયા: અસારવા સિવિલમાં ઓગસ્ટમાં મેલેરિયાના 43 કેસ, જ્યારે સપ્ટેમ્બરના 16 દિવસમાં 20 કેસ નોંધાયા છે. ઝેરી મેલેરિયાના ગત મહિને 13 અને હાલમાં 9 કેસ છે. સોલા સિવિલમાં મેલેરિયાના 1,321 શંકાસ્પદ દર્દીમાંથી 18 દર્દીના રિપોર્ટ કન્ફર્મ આવ્યા છે.
ચિકનગુનિયા અને ટાઈફોઈડ: સિવિલમાં ઓગસ્ટમાં ચિકનગુનિયાના 10 કેસ હતા, જે સપ્ટેમ્બરમાં વધીને નવા 17 કેસ થયા છે. સોલામાં ચિકનગુનિયાના 16 શંકાસ્પદમાંથી 1 પોઝિટિવ કેસ નોંધાયો છે. સિવિલમાં ટાઈફોઈડના દોઢ માસમાં 15 દર્દીઓ નોંધાયા છે, જ્યારે સોલામાં 4 દર્દીઓને સારવાર અપાઈ છે.
હિપેટાઈટિસ અને પાચનતંત્રના રોગો: સિવિલમાં ઓગસ્ટમાં હિપેટાઈટિસના 194 કેસ હતા, જ્યારે સપ્ટેમ્બરના 16 દિવસમાં 73 કેસ નોંધાયા છે. સોલા સિવિલમાં વાયરલ હિપેટાઇટિસ-એ નો 1, વાયરલ હિપેટાઈટિસ-ઈ ના 5 અને ઝાડા-ઉલટીના 14 દર્દીઓને સારવાર આપવામાં આવી છે.