Independence Day 2026: દેશભરમાં રાષ્ટ્રીય તહેવારની ઉત્સાહપૂર્વક ઉજવણી કરવામાં આવી રહી છે, ત્યારે અમદાવાદના શાહીબાગ સ્થિત સુપ્રસિદ્ધ BAPS સ્વામિનારાયણ મંદિર ખાતે પણ સ્વતંત્રતા પર્વની અનોખી રીતે ઉજવણી કરવામાં આવી હતી. વર્તમાન ગુરુહરિ પરમ પૂજ્ય મહંત સ્વામી મહારાજની પાવન અને પ્રત્યક્ષ ઉપસ્થિતિમાં આયોજિત આ ભવ્ય મહોત્સવે હરિભક્તોમાં દેશભક્તિ અને આસ્થાનો અદભુત સમન્વય સર્જ્યો હતો.
80મા સ્વતંત્રતા પર્વે ઉમટ્યું હરિભક્તોનું ઘોડાપૂર
શાહીબાગ મંદિર પરિસરમાં 80મા સ્વતંત્રતા પર્વની ઉજવણી નિમિત્તે હરિભક્તોમાં ભારે ઉત્સાહ જોવા મળ્યો હતો. મહંત સ્વામી મહારાજના દર્શન કરવા અને રાષ્ટ્રીય પર્વની ભક્તિમય ઉજવણીમાં સહભાગી થવા માટે વહેલી સવારથી જ શ્રદ્ધાળુઓ ઉમટી પડ્યા હતા. આ ભવ્ય અને પ્રેરણાદાયી મહોત્સવમાં આશરે 15,000 કરતાં પણ વધુ હરિભક્તો જોડાયા હતા અને સમગ્ર વાતાવરણ રાષ્ટ્રભક્તિના રંગે રંગાઈ ગયું હતું.
રાષ્ટ્રના નવનિર્માણ અને લોક-સુખાકારી માટે પ્રાર્થના
આ ભવ્ય અવસરે શાહીબાગ મંદિર ખાતે પરમ પૂજ્ય મહંત સ્વામી મહારાજની પ્રત્યક્ષ નિશ્રામાં એક વિશેષ સભાનું આયોજન કરવામાં આવ્યું હતું. પૂજ્ય સ્વામીજીએ ભારત દેશની એકતા, અખંડિતતા અને રાષ્ટ્રના ગૌરવમાં ઉત્તરોત્તર વધારો થાય તે માટે હૃદયપૂર્વક મંગલ પ્રાર્થના કરી હતી. આ સાથે તેમણે દેશના પ્રત્યેક નાગરિકનું જીવન સુખમય તેમજ આરોગ્યપ્રદ રહે તેવા આશીર્વાદ પાઠવ્યા હતા.
નવા સંકલ્પોનું પવિત્ર પર્વ, રાષ્ટ્ર પ્રત્યે સમર્પણનો ભાવ
સ્વતંત્રતા દિવસ એ માત્ર એક ઉત્સવ નથી, પરંતુ દેશને પ્રગતિ અને નવનિર્માણની નવી ઊંચાઈઓ પર લઈ જવા માટેના નવા સંકલ્પો લેવાનું પવિત્ર પર્વ છે. આ દિવ્ય વાતાવરણમાં ઉપસ્થિત પ્રત્યેક નાગરિકે રાષ્ટ્ર પ્રત્યે સમર્પણ અને અસ્મિતાની એક અનોખી ઊર્જાનો અનુભવ કર્યો હતો. મહંત સ્વામી મહારાજની પ્રેરણાદાયી હાજરીએ આ રાષ્ટ્રીય પર્વની ઉજવણીને ભક્તો માટે યાદગાર બનાવી દીધી હતી.