Rakesh Bedi Family Tree: બોલિવુડની બ્લોકબસ્ટર ફિલ્મ "ધુરંધર" હાલમાં બોક્સ ઓફિસ પર છપ્પરફાડ કમાણી કરીને ધૂમ મચાવી રહી છે. આ ફિલ્મમાં પોતાના દમદાર અને નેગેટિવ અભિનયથી જે કલાકાર સૌથી વધુ ચર્ચા જગાવી રહ્યા છે, તે છે ફિલ્મ અને ટીવી ઈન્ડસ્ટ્રીના દિગ્ગજ અભિનેતા રાકેશ બેદી. ફિલ્મ ‘ધુરંધર’માં તેમણે પાકિસ્તાની રાજકારણી ‘જમીલ જમાલી’ની પડકારજનક ભૂમિકા ભજવી છે, જેના માટે તેમના જોરદાર વખાણ થઈ રહ્યા છે. સામાન્ય રીતે કોમેડી પાત્રો માટે જાણીતા રાકેશ બેદીએ આ નેગેટિવ રોલ દ્વારા સાબિત કર્યું છે કે તેઓ અભિનયના અસલી ધુરંધર છે. ચાલો આજે આપણે આ લોકપ્રિય અભિનેતાની પર્સનલ લાઈફ, તેમનો પરિવાર અને તેમની સફર વિશે કેટલીક રસપ્રદ વાતો જાણીએ.
‘તારક મહેતા કા ઉલ્ટા ચશ્મા’માં બોસનું યાદગાર પાત્ર
રાકેશ બેદીએ ટીવી ઈન્ડસ્ટ્રીને અનેક હિટ સિરિયલો આપી છે, પરંતુ વર્તમાન સમયમાં તેઓ ભારતભરમાં ઘરે-ઘરે ખૂબ જ લોકપ્રિય શો ‘તારક મહેતા કા ઉલ્ટા ચશ્મા’ માટે જાણીતા છે. આ સિરિયલમાં તેઓ મહેતા સાહેબ (તારક મહેતા) ના બોસનું પાત્ર ભજવી રહ્યા છે. શોમાં જ્યારે પણ તારક મહેતા ઓફિસમાં રજા માંગે કે કામ ચોરી કરે, ત્યારે રાકેશ બેદીનું ગુસ્સાવાળું છતાં રમુજી ‘બોસ’નું પાત્ર દર્શકોને હસાવી-હસાવીને લોથપોથ કરી દે છે. આ પાત્રે તેમને નાના પડદા પર એક અલગ જ ઓળખ આપી છે.
કેન્દ્રીય વિદ્યાલયથી FTII સુધીની સફર
1 ડિસેમ્બર 1954 ના રોજ જન્મેલા રાકેશ બેદીએ પોતાનો પ્રારંભિક અભ્યાસ દિલ્હીની એન્ડ્રુઝગંજ સ્થિત કેન્દ્રીય વિદ્યાલયમાંથી પૂર્ણ કર્યો હતો. શાળાના સમયથી જ તેમને એક્ટિંગનો ભારે શોખ હતો અને તેઓ મોનો એક્ટિંગ સ્પર્ધાઓમાં ભાગ લેતા હતા. બાદમાં તેમણે નવી દિલ્હીના પ્રખ્યાત થિયેટર ગ્રુપ ‘પિયરોટ્સ ટ્રુપ’ સાથે કામ કર્યું. અભિનયની બારીકીઓ શીખવા માટે તેઓ પૂણેની પ્રતિષ્ઠિત ‘ફિલ્મ એન્ડ ટેલિવિઝન ઇન્સ્ટિટ્યૂટ ઓફ ઇન્ડિયા’ (FTII) માં જોડાયા અને ત્યાંથી એક્ટિંગનો પ્રોફેશનલ અભ્યાસ કર્યો.
150થી વધુ ફિલ્મો અને હિટ સિરિયલોની સફર
રાકેશ બેદીએ વર્ષ 1979 માં મહાન અભિનેતા સંજીવ કુમાર સ્ટારર ફિલ્મ ‘હમારે તુમ્હારે’ થી એક સહાયક અભિનેતા તરીકે બોલિવુડમાં ડેબ્યૂ કર્યું હતું. ત્યારબાદ તેમણે ક્યારેય પાછું વળીને જોયું નથી. તેમણે ‘ચશ્મે બદ્દૂર’ (1981) અને ‘મેરા દમાદ’ (1985) જેવી સુપરહિટ ફિલ્મોમાં યાદગાર ભૂમિકાઓ ભજવી અને અત્યાર સુધીમાં 150 થી વધુ ફિલ્મોમાં કામ કર્યું છે. ટીવીની દુનિયામાં પણ ‘યે જો હૈ ઝિંદગી’ (1984), ‘શ્રીમાન શ્રીમતી’ (1994-97), ‘યસ બોસ’ (1999-2009) અને ‘ભાભી જી ઘર પર હૈ’ (2015-હાલ) જેવા ઓલ-ટાઇમ હિટ શો આપ્યા છે. આ ઉપરાંત, વિજય તેંડુલકરના લોકપ્રિય વન-મેન નાટક ‘મસાજ’માં તેમણે એકલા હાથે 24 અલગ-અલગ પાત્રો ભજવીને ઇતિહાસ રચ્યો હતો. તેમણે બાળકોના સાયન્સ શો ‘સાયન્સ વિથ બ્રેઈનકેફે’નું હોસ્ટિંગ પણ કર્યું છે.
આવો છે રાકેશ બેદીનો પ્રેમાળ પરિવાર
અભિનયની દુનિયામાં આટલી મોટી સફળતા મેળવનારા રાકેશ બેદી પર્સનલ લાઈફમાં ખૂબ જ શાંત અને કૌટુંબિક માણસ છે. તેમણે આરાધના બેદી સાથે લગ્ન કર્યા છે, જેઓ દરેક વળાંક પર તેમની પડખે ઉભા રહ્યા છે. આ સુખી દંપતીને બે સુંદર પુત્રીઓ છે, જેમના નામ રિદ્ધિમા બેદી અને રિતિકા બેદી છે. રાકેશ બેદી પોતે ઈન્ડસ્ટ્રીનો એક ખૂબ જ સન્માનિત અને જાણીતો ચહેરો છે અને તેમનો પરિવાર પણ લાઈમલાઈટથી દૂર રહીને હંમેશા તેમને સપોર્ટ કરતો જોવા મળે છે. ફિલ્મ ‘ધુરંધર’ની ભવ્ય સફળતા બાદ તેમનો પરિવાર પણ અભિનેતાની આ નવી ઇનિંગથી ખૂબ જ ખુશ છે.