Malaika Arora Viral Video: બોલિવૂડની જાણીતી અભિનેત્રી મલાઈકા અરોરા પોતાની પ્રોફેશનલ લાઈફ કરતા પર્સનલ લાઈફને લઈને વધુ ચર્ચામાં રહે છે. તાજેતરમાં જુહુમાં મલાઈકાના નવા રેસ્ટોરન્ટની ઓપનિંગ પાર્ટીનો એક વિડિયો સોશિયલ મીડિયા પર વાયરલ થયો હતો, જેમાં તે 'સ્પ્લિટ્સવિલા 16' ફેમ સોરાબ બેદી સાથે ક્લોઝ ડાન્સ કરતી અને મસ્તી કરતી જોવા મળી હતી. આ વીડિયો વાયરલ થતાની સાથે જ બંનેના ડેટિંગની અફવાઓએ જોર પકડ્યું હતું. હવે આ મામલે સોરાબ બેદીએ મૌન તોડ્યું છે અને સત્ય જાહેર કર્યું છે.
અમે માત્ર સારા મિત્રો છીએ: સોરાબ બેદી
સોરાબ બેદીએ તાજેતરમાં આપેલા એક ઇન્ટરવ્યુમાં સ્પષ્ટ કર્યું છે કે તેમના અને મલાઈકા વચ્ચે કોઈ રોમેન્ટિક સંબંધ નથી. સોરાબે જણાવ્યું કે, "અમે બંને માત્ર સારા મિત્રો છીએ અને અમારો સંબંધ ઘણો જૂનો છે. લોકો જે રીતે વાતો કરી રહ્યા છે તેનાથી હું ઘણો નિરાશ છું." સોરાબના મતે, બે લોકો સાથે જોવા મળે તેનો અર્થ એ નથી કે તેઓ રિલેશનશિપમાં છે. તેમણે લોકોને વિનંતી કરી કે કોઈ પણ યુવતી વિશે બોલતા પહેલા બે વાર વિચારવું જોઈએ, કારણ કે આવી પાયા વગરની વાતો માનસિક સ્વાસ્થ્ય પર ખરાબ અસર કરી શકે છે.
કેવી રીતે થઈ હતી મુલાકાત?
સોરાબે તેમની અને મલાઈકાની મિત્રતા વિશે વિગતવાર જણાવતા કહ્યું કે, જ્યારે તેઓ મોડેલિંગના શરૂઆતના દિવસોમાં હતા ત્યારે ડેલનાઝ દારુવાલા અને વાહબીઝ મહેતા તેમના મેન્ટર્સ હતા. આ બંને મલાઈકાના ખૂબ જ નજીકના મિત્રો છે. તેમના દ્વારા જ સોરાબની મુલાકાત મલાઈકા સાથે થઈ હતી. ત્યારથી તેઓ એક જ ફ્રેન્ડ સર્કલનો ભાગ છે અને વર્ષોથી સાથે પાર્ટીઓ કરે છે. સોરાબે ઉમેર્યું કે, "મેં પહેલા પણ મલાઈકા સાથે ફોટા શેર કર્યા હતા, પરંતુ ત્યારે લોકો મને ઓળખતા નહોતા એટલે કોઈએ ધ્યાન આપ્યું નહોતું. હવે જ્યારે હું જાણીતો થયો છું, ત્યારે નાની વાતનું વતેસર કરવામાં આવી રહ્યું છે."
મલાઈકાની પર્સનલ લાઈફ પર લોકોની નજર
મલાઈકા અરોરા 2017 માં અરબાઝ ખાનથી અલગ થઈ હતી અને તેમને એક પુત્ર અરહાન છે. ત્યારબાદ તેનું નામ લાંબા સમય સુધી અર્જુન કપૂર સાથે જોડાયેલું રહ્યું હતું. છેલ્લા કેટલાક સમયથી મલાઈકાનું નામ હીરાના વેપારી હર્ષ મહેતા સાથે પણ જોડાઈ રહ્યું છે. જોકે, મલાઈકાએ હર્ષ મહેતા કે સોરાબ બેદી સાથેની અફવાઓ પર હજુ સુધી કોઈ સત્તાવાર પ્રતિક્રિયા આપી નથી. સોરાબે મલાઈકાના નવા રેસ્ટોરન્ટ માટે તેને શુભકામનાઓ આપી હતી અને માત્ર એક મિત્ર તરીકે તેને સપોર્ટ કરવા ત્યાં પહોંચ્યો હોવાનું જણાવ્યું હતું.