Sonarika Bhadoria: નાના પડદા પર લોકપ્રિય પૌરાણિક શ્રેણી 'દેવોં કે દેવ... મહાદેવ' (Devon Ke Dev... Mahadev) માં દેવી પાર્વતીની ભૂમિકા ભજવીને દેશભરમાં જાણીતી બનેલી અભિનેત્રી સોનારિકા ભદોરિયાએ (Sonarika Bhadoria) એન્ટરટેઇનમેન્ટ ઇન્ડસ્ટ્રી વિશે એક અત્યંત ચોંકાવનારો ખુલાસો કર્યો છે. સોનારિકાએ તાજેતરમાં આપેલા એક ઇન્ટરવ્યુમાં ખુલ્લેઆમ જણાવ્યું છે કે યોગ્ય મહેનતાણાની માંગણી કરવા બદલ તેને એક સુપરહિટ શોમાંથી રાતોરાત બહાર કરી દેવામાં આવી હતી.
TRP ઊંચા હોવા છતાં વેતનમાં ભેદભાવનો આરોપ
ટેલિવિઝન ક્ષેત્રે કલાકારો વચ્ચે રહેલા વેતનના તફાવત પર વાત કરતાં સોનારિકાએ પોતાના કડવા અનુભવો શેર કર્યા હતા. તેણે કોઈપણ કલાકાર કે નિર્માતાનું નામ લીધા વિના જણાવ્યું કે, "શોનો TRP એટલો ઊંચો હતો કે ચેનલે આખી ટીમ માટે પાર્ટી યોજી હતી. આવી સફળ પરિસ્થિતિમાં કોઈ પણ કલાકાર પોતાના સારા કામ માટે પ્રશંસા અથવા મહેનતાણામાં વાજબી વધારાની અપેક્ષા રાખે તે સ્વાભાવિક છે."
સોનારિકાએ વધુમાં ઉમેર્યું, "જ્યારે મેં પગાર વધારાની માંગ કરી, ત્યારે મને ઊલટો સવાલ પૂછવામાં આવ્યો કે હું કયા આધારે આ માંગણી કરી રહી છું. આખરે વધુ પગાર માંગવાને કારણે મને શોમાંથી કાઢી મૂકવામાં આવી અને મારી જગ્યાએ અન્ય અભિનેત્રીને સાઇન કરી લેવાઈ. તે સમયે જ મારી સાથે કામ કરતા પુરુષ સહ-કલાકારો અવારનવાર શો છોડી દેવાની ધમકી આપતા હતા અને તેમનું મહેનતાણું ત્રણ ગણું કરી દેવામાં આવતું હતું, છતાં મારો પગાર એક પણ વાર વધારવામાં આવ્યો નહોતો."
સાઉથ ફિલ્મ ઇન્ડસ્ટ્રીમાં પણ પે-ગેપનો સામનો
સોનારિકા ભદોરિયાએ માત્ર ટીવી ઇન્ડસ્ટ્રી જ નહીં પરંતુ તેલુગુ અને તમિલ ફિલ્મ ઉદ્યોગમાં પણ પ્રવર્તતા વેતન ભેદભાવ વિશે વાત કરી હતી. તેના મતે, સાઉથ ફિલ્મોમાં નવા પુરુષ કલાકારોને પણ ખૂબ મોટી રકમ ચૂકવવામાં આવે છે, કારણ કે પ્રેક્ષકો અને માર્કેટ તેમને 'હીરો' તરીકે જુએ છે, જ્યારે મહિલા કલાકારોને તે પ્રમાણમાં ઓછું વળતર મળે છે.
બિકીની ટ્રોલિંગ પર આપ્યો જડબાતોડ જવાબ
ટીવી પર દેવી પાર્વતીનું સનાતન પાત્ર ભજવ્યા બાદ સોશિયલ મીડિયા પર બિકીની ફોટા શેર કરવા બદલ સોનારિકાને ભારે ટ્રોલિંગનો સામનો કરવો પડ્યો હતો. આ ટ્રોલિંગ અંગે પ્રતિક્રિયા આપતાં સોનારિકાએ સ્પષ્ટ શબ્દોમાં કહ્યું કે, "હું બિકીની પહેરીશ કે કેવા કપડાં પહેરીશ—તે મારી સંપૂર્ણપણે અંગત પસંદગી છે. તેમાં બીજા કોઈને વાંધો હોવો જોઈએ નહીં."