Rashmika Mandanna Family Tree: સાઉથ ઇન્ડિયન સિનેમાના સુપરસ્ટાર્સ વિજય દેવરકોન્ડા અને રશ્મિકા મંદાના 26 ફેબ્રુઆરી 2026ના રોજ ઉદયપુરમાં હિંદુ પરંપરા મુજબ લગ્નના પવિત્ર બંધનમાં બંધાઈ ગયા છે. આ શાહી લગ્ન બાદ હવે સોશિયલ મીડિયા પર રશ્મિકાના પરિવાર અને તેના 'ફેમિલી ટ્રી' વિશે જાણવા માટે ચાહકોમાં ભારે ઉત્સુકતા જોવા મળી રહી છે. વિજય દેવરકોન્ડાના સાસુ-સસરા કોણ છે અને રશ્મિકાની નાની બહેન શું કરે છે, તેની તમામ વિગતો અહીં પ્રસ્તુત છે.
વિજય દેવરકોન્ડાના સાસુ-સસરા અને પારિવારિક પૃષ્ઠભૂમિ
રશ્મિકા મંદાનાનો જન્મ 5 એપ્રિલ 1996 ના રોજ કર્ણાટકના વિરાજપેટમાં એક મધ્યમ વર્ગના પરિવારમાં થયો હતો. તેના પિતાનું નામ મદન મંદાના છે, જેઓ બિઝનેસ બેકગ્રાઉન્ડ ધરાવે છે અને કર્ણાટકમાં કોફી એસ્ટેટ તથા ફંક્શન હોલના માલિક છે. રશ્મિકાની માતાનું નામ સુમન મંદાના છે, જેઓ ગૃહિણી છે. રશ્મિકાના કરિયરના દરેક વળાંક પર તેની માતાએ તેને ઘણો સાથ આપ્યો છે. લગ્ન પ્રસંગે વિજયના પરિવારે રશ્મિકાને સોનાની બંગડીઓ ભેટમાં આપી હતી.
નાની બહેન શિમન સાથેનું ભાવુક બોન્ડ
રશ્મિકાને કોઈ સગો ભાઈ નથી, પરંતુ તેને એક નાની બહેન છે જેનું નામ શિમન મંદાના છે. રશ્મિકા અને તેની બહેન વચ્ચે ઉંમરનો ઘણો મોટો તફાવત છે. શિમન રશ્મિકા કરતા 16 વર્ષ નાની છે અને હાલમાં તેની ઉંમર અંદાજે 13 વર્ષ છે. રશ્મિકા તેને પ્રેમથી 'બેબી સિસ્ટર' કહે છે. એક ઇન્ટરવ્યુમાં રશ્મિકાએ અફસોસ વ્યક્ત કર્યો હતો કે છેલ્લા આઠ વર્ષથી કામમાં વ્યસ્ત હોવાને કારણે તે પોતાની બહેનને મોટી થતી જોઈ શકી નથી. શિમન હાલમાં તેના માતા-પિતા સાથે મૈસૂરમાં રહે છે અને પોતાનો અભ્યાસ કરી રહી છે.
સંઘર્ષથી સફળતા સુધીની સફર
આજે કરોડોની માલિક અને લક્ઝરી લાઈફસ્ટાઈલ જીવતી રશ્મિકા માટે બાળપણ એટલું સરળ નહોતું. તેણે ખુલાસો કર્યો હતો કે એક સમયે તેના પરિવાર પાસે ઘરનું ભાડું ભરવાના પણ પૈસા નહોતા અને તેના માતા-પિતા તેને રમકડાં પણ અપાવી શકતા નહોતા. રશ્મિકાએ જર્નાલિઝમનો અભ્યાસ કર્યો છે અને 2014 માં મોડેલિંગથી પોતાની કારકિર્દી શરૂ કરી હતી. 2016માં કન્નડ ફિલ્મ 'કિરિક પાર્ટી' થી તેણે અભિનય ક્ષેત્રે પદાર્પણ કર્યું હતું. રશ્મિકા પોતાના કાંડા પર 'Irreplaceable' (જે બદલી ન શકાય તેવું) શબ્દનું ટેટૂ પણ ધરાવે છે.
વિજય અને રશ્મિકાની જોડી
વિજય અને રશ્મિકાની મુલાકાત 2018 માં આવેલી રોમેન્ટિક કોમેડી ફિલ્મ 'ગીતા ગોવિંદમ' ના શૂટિંગ દરમિયાન થઈ હતી. ત્યારબાદ 2019 માં તેમણે 'ડિયર કોમ્રેડ' માં પણ સાથે કામ કર્યું હતું. લાંબા સમય સુધી એકબીજાને ડેટ કર્યા બાદ આખરે તેમણે લગ્નનો નિર્ણય લીધો હતો. 26 ફેબ્રુઆરીએ ઉદયપુરમાં લગ્ન બાદ હવે 4 માર્ચ 2026 ના રોજ હૈદરાબાદમાં એક ભવ્ય રિસેપ્શન પાર્ટીનું આયોજન કરવામાં આવ્યું છે, જેમાં દક્ષિણ ભારત અને બોલિવૂડના અનેક સિતારાઓ હાજરી આપી છે.