Priyanka Chopra: બોલિવૂડની ‘દેશી ગર્લ’ પ્રિયંકા ચોપરા ભલે અત્યારે સાત સમંદર પાર અમેરિકામાં સ્થાયી થઈ હોય, પણ તે અવારનવાર એવું કંઈક કરે છે કે આખું બોલિવૂડ અને સોશિયલ મીડિયા ચોંકી જાય છે. તાજેતરમાં પ્રિયંકાએ તેના ઇન્સ્ટાગ્રામ પર કેટલીક તસવીરો શેર કરી હતી, જેમાં એક એવી તસવીર હતી જેણે ઇન્ટરનેટ પર ‘ભૂકંપ’ લાવી દીધો છે. આ તસવીર બીજું કોઈ નહીં પણ બોલિવૂડના ભૂતપૂર્વ કપલ સલમાન ખાન અને ઐશ્વર્યા રાયની હતી.
પ્રિયંકાની ‘થ્રોબેક’ પોસ્ટ અને સલમાન-ઐશ્વર્યાનો જાદુ
પ્રિયંકા ચોપરા સોશિયલ મીડિયા પર ઘણી સક્રિય રહે છે અને અવારનવાર પોતાની દિનચર્યાની ઝલક ફેન્સ સાથે શેર કરતી હોય છે. રવિવારે તેણે ઇન્સ્ટાગ્રામ પર એક ફોટો સીરીઝ (Carousel) પોસ્ટ કરી હતી. આ પોસ્ટમાં તેણે ફિલ્મ સેટ્સ, વેકેશન અને ઘરના આરામદાયક પળોની તસવીરો મૂકી હતી. જોકે, આ સીરીઝની પાંચમી સ્લાઇડ જોતા જ યુઝર્સની આંખો ફાટી ગઈ હતી. આ ફોટામાં ટીવી સ્ક્રીન પર સંજય લીલા ભણસાલીની આઇકોનિક ફિલ્મ 'હમ દિલ દે ચૂકે સનમ' ચાલી રહી હતી અને તેમાં સલમાન ખાન અને ઐશ્વર્યા રાય એકસાથે જોવા મળી રહ્યા હતા. પ્રિયંકાએ આ ફોટો શેર કરીને જાણે દાયકાઓ જૂની યાદો તાજી કરી દીધી છે.
સોશિયલ મીડિયા પર કોમેન્ટ્સનો વરસાદ
સલમાન અને ઐશ્વર્યાના બ્રેકઅપના વર્ષો પછી તેમને એક જ ફ્રેમમાં જોઈને ચાહકો ક્રેઝી થઈ ગયા છે. પ્રિયંકાની પોસ્ટ પર યુઝર્સે રમુજી અને આશ્ચર્યજનક પ્રતિક્રિયાઓ આપવાનું શરૂ કર્યું છે:
- એક યુઝરે લખ્યું, "ઐશ્વર્યા અત્યારે વિચારતી હશે કે પીસી, તે આ ફોટો કેમ શેર કર્યો?"
- બીજા એક ફેને લખ્યું, "ગમે તે કહો, સલમાન-ઐશ્વર્યાની જોડી જેવી બીજી કોઈ જોડી બોલિવૂડમાં નથી."
- અન્ય એક યુઝરે ચપટી લેતા કહ્યું કે, "પ્રિયંકાએ જાણીજોઈને લાઈમલાઈટ ચોરવા માટે આ ફોટો મૂક્યો લાગે છે!"
સલમાન એસનું બ્રેકઅપ
1990ના દાયકામાં સલમાન અને ઐશ્વર્યાનો પ્રેમ બોલિવૂડમાં ચર્ચાનો વિષય હતો. 1999માં આવેલી 'હમ દિલ દે ચૂકે સનમ' દરમિયાન તેમની નિકટતા વધી હતી, પરંતુ 2002માં આ સંબંધનો ખૂબ જ કડવો અંત આવ્યો હતો. ઐશ્વર્યાએ સલમાન પર ગંભીર આક્ષેપો કર્યા હતા અને ત્યાર બાદ ક્યારેય તેની સાથે કામ ન કરવાનો નિર્ણય લીધો હતો. આજે 24 વર્ષ પછી પણ બંને એકબીજા સાથે વાત કરવાનું ટાળે છે. ઐશ્વર્યા હવે બચ્ચન પરિવારની વહુ છે અને અભિષેક બચ્ચન સાથે સુખી સંસાર વિતાવી રહી છે, જ્યારે સલમાન ખાન હજુ પણ સિંગલ છે.