Aishwarya Rai Ramp Walk Look: ફ્રાન્સની રાજધાની પેરિસમાં હાલમાં ફેશન વીક ચાલી રહ્યું છે, જેની શરૂઆત 29 સપ્ટેમ્બરથી થઈ છે. આ ઇવેન્ટમાં વિશ્વભરની ઘણી આંતરરાષ્ટ્રીય હસ્તીઓ પોતાની સુંદરતાનો જાદુ પાથરે છે. બોલિવૂડની પ્રખ્યાત અભિનેત્રી ઐશ્વર્યા રાય બચ્ચન પણ દર વખતની જેમ આ ફેશન શોનો હિસ્સો બની છે. પેરિસ ફેશન વીક 2025 માં ઐશ્વર્યા રાયની રેમ્પ વૉકની તસવીરો હાલ વાઈરલ થઈ રહી છે.
હીરાજડિત ડ્રેસમાં છવાઈ ઐશ્વર્યા રાય
આ ઇવેન્ટમાં ઐશ્વર્યાએ લોરિયલ પેરિસની એમ્બેસેડર તરીકે રેમ્પ પર પોતાનો જલવો વિખેર્યો હતો. તેમણે ભારતના પ્રખ્યાત ફેશન ડિઝાઇનર મનીષ મલ્હોત્રા દ્વારા ડિઝાઇન કરાયેલો ડ્રેસ પહેર્યો હતો. આ એક બ્લેક કલરની શેરવાની હતી, જેમાં અમૂલ્ય હીરાની ડિઝાઇન કરવામાં આવી હતી, જેણે દરેકનું ધ્યાન ખેંચ્યું હતું. તસવીરોમાં ઐશ્વર્યા હાથ જોડીને ત્યાં હાજર લોકોને "નમસ્તે" કરતી અને ફ્લાઈંગ કિસ આપતી જોવા મળે છે.
ઐશ્વર્યા રાયની રેમ્પ વૉકની તસવીરો વાઈરલ
ડિઝાઇનર મનીષ મલ્હોત્રાએ પોતાના ઓફિશિયલ ઇન્સ્ટાગ્રામ હેન્ડલ પર આ ડ્રેસની તસવીરો શેર કરી અને જણાવ્યું કે આ ડ્રેસ જૂના સમયની પરંપરા અને આજના સમયની ફેશનને જોડે છે. ઐશ્વર્યાનો આ સ્ટાઇલિશ લુક ખૂબ જ ખાસ અને શાનદાર લાગી રહ્યો હતો. તેમણે બોલ્ડ મેકઅપની સાથે લાલ રંગની લિપસ્ટિક લગાવી હતી, જેણે તેમના લુકને વધુ આકર્ષક બનાવ્યો હતો. ઐશ્વર્યાનો આ સંપૂર્ણ લુક પેરિસ ફેશન વીકમાં ચર્ચાનો વિષય બન્યો છે.
પેરિસ ફેશન વીકમાંથી ઐશ્વર્યાની લેટેસ્ટ તસવીરો હવે ઇન્ટરનેટ પર વાયરલ થઈ રહી છે. ચાહકોને તેમનો આ અંદાજ ખૂબ જ પસંદ આવી રહ્યો છે અને તેઓ આ તસવીરો પર ખૂબ લાઈક્સ અને કોમેન્ટ્સ કરી રહ્યા છે.