મને ફક્ત મારા નામથી જ બોલાવજો... ક્યારેય અહંકાર ન રાખનાર નાના પાટેકરના વતન મરુડમાં છવાયો શોક

Nana Patekar Childhood Stories: બોલિવૂડના દિગ્ગજ અને અજોડ અભિનેતા નાના પાટેકરના 75 વર્ષની વયે ગોવા સ્થિત તેમના નિવાસસ્થાને ગુરુવારે અવસાન થયું છે. તેમના નિધનના સમાચારથી માત્ર ફિલ્મ જગતમાં જ નહીં, પરંતુ તેમના પૈતૃક ગામ મરુડમાં પણ શોકનો માહોલ છવાઈ ગયો છે. મહારાષ્ટ્રના રાયગઢ જિલ્લામાં આવેલું આ ગામ મરુડ એ જગ્યા છે જ્યાં નાના પાટેકરનું બાળપણ અને જીવનના શરૂઆતના વર્ષો વીત્યા હતા.

પ્રાથમિક શાળાથી મુંબઈ સુધીનો સંઘર્ષ

નાના પાટેકરનું બાળપણ મરુડની સાંકડી ગલીઓ અને અરબી સમુદ્રના કિનારાઓ વચ્ચે પસાર થયું હતું. તેમણે મરુડ નગર પરિષદની પ્રાઇમરી સ્કૂલ નંબર-4માં ધોરણ 1 થી 4 સુધીનો અભ્યાસ કર્યો હતો. ત્યારબાદ આગળના અભ્યાસ અને જીવનના મોટા સંઘર્ષો માટે તેઓ મરુડથી અંદાજે 130 કિલોમીટર દૂર મુંબઈ ચાલ્યા ગયા હતા. મુંબઈમાં જઈને સિનેમા જગતમાં એક મહાન અભિનેતા તરીકે અપાર ખ્યાતિ મેળવવા છતાં, તેમનો આત્મિક લગાવ હંમેશાં પોતાના વતન મરુડ સાથે જ રહ્યો હતો.

બાળપણના મિત્રોએ વાગોળ્યા અનેક કિસ્સાઓ

ગામના વડીલો અને મિત્રોએ નાના પાટેકર સાથે જોડાયેલી બાળપણની સુંદર યાદો તાજી કરી છે. ગામના એક વડીલ ચંદ્રકાંત સખાકરે જણાવ્યું કે તેમનો પોત્ર બાલા સખાકર અને નાના પાટેકર બાળપણના ગાઢ મિત્રો હતા.

ચંદ્રકાંતે જૂની યાદો વાગોળતા કહ્યું- સાંજ પડે એટલે બંને જણા સમુદ્ર કિનારે આવતી માછીમારોની નાની નાવડીઓ જોયા કરતા. હું તેમને નાવમાંથી પાણી બહાર કાઢવાનું કામ સોંપતો. એકવાર જ્યારે નાનાએ માછીમારી કરવા જવાની જીદ પકડી, ત્યારે અમે એક 'ઇન્ડિયન સેલ્મોન' માછલી પકડી હતી, જેને નાના ખુબ જ ઉત્સાહથી પોતાના ખભા પર ઉઠાવીને ઘરે લઈ ગયા હતા.

તે જ રીતે, શાળાના સમયના તેમના બે વર્ષ સિનિયર રહેલા એક મિત્રએ જણાવ્યું કે નાના હંમેશાં અત્યંત મિલનસાર સ્વભાવના હતા. જ્યારે તેઓ પ્રખ્યાત અભિનેત્રી દીપ્તિ નવલ સાથે મરુડ આવ્યા હતા, ત્યારે તેઓ ઐતિહાસિક પદ્મદુર્ગ કિલ્લો જોવા માંગતા હતા. મિત્રો તેમને નાની નાવડીમાં બેસાડીને સમુદ્ર વચ્ચે આવેલા તે કિલ્લે લઈ ગયા હતા.

સુપરસ્ટાર બન્યા પછી પણ ક્યારેય નહોતો આવ્યો અહંકાર

ગામના લોકોના જણાવ્યા અનુસાર, નાના પાટેકર ક્યારેય પોતાની સ્ટારડમ કે સફળતાના ઘમંડમાં રહ્યા નહોતા. તેમના એક સિનિયર મિત્રે યાદ કર્યું કે ગયા વર્ષે જ તેઓ પુણે સ્થિત નાનાના ફાર્મહાઉસ પર ગયા હતા. ત્યારે નાનાએ તેમને આ વર્ષે પણ મળવાનું વચન આપ્યું હતું અને હંમેશાં એવો જાગ્રહ રાખતા કે તેમને માત્ર 'નાના' કહીને જ બોલાવવામાં આવે, કોઈ પણ પ્રકારની ઔપચારિકતાની જરૂર નથી.

મરુડમાં રેસ્ટોરન્ટ ચલાવતા વિજય પાટીલે જણાવ્યું કે નાના હંમેશાં ગર્વથી કહેતા કે તેઓ મૂળ મરુડના જ છે. રોહામાં યોજાયેલા એક કાર્યક્રમમાં, જ્યાં દિવંગત નેતા અજીત પવાર પણ હાજર હતા, ત્યારે પણ નાનાએ જાહેરમાં કહ્યું હતું કે તેઓ ખાવાનું ખાવા માટે માત્ર વિજય પાટીલના રેસ્ટોરન્ટમાં જ જશે.

પરિવાર પ્રત્યેનો અગાઢ પ્રેમ

નાના પાટેકરના પિતરાઈ ભાઈ (કઝિન) શ્રીકાંત સર્વે જણાવે છે કે નાના પોતાના પરિવારના દરેક સભ્યની ખૂબ કાળજી રાખતા હતા. તેઓ પરિવારના દરેક વ્યક્તિનું કુશળક્ષમ પૂછતા અને ભાઈઓનું ખાસ ધ્યાન રાખતા. ઉલ્લેખનીય છે કે શ્રીકાંતની માતા, નાના પાટેકરના પિતાની બહેન હતા. મરુડમાં આજે પણ તેમનું પૈતૃક મકાન અને પ્રોપર્ટી છે, જે તેમના વતન સાથેના અતૂટ સંબંધોની સાક્ષી પુરી પાડે છે.