Laalo Krishna Sada Sahaayate, Cannes 2026 Premiere: ગુજરાતી ફિલ્મ ઈન્ડસ્ટ્રી માટે એક ઐતિહાસિક અને ગૌરવશાળી ક્ષણ આવી છે. અંકિત સખિયા દ્વારા નિર્દેશિત ફિલ્મ 'લાલો - કૃષ્ણ સદા સહાયતે' પ્રતિષ્ઠિત 'કાન્સ ફિલ્મ ફેસ્ટિવલ 2026' માં તેના માર્કેટ પ્રીમિયર માટે સજ્જ છે. ફિલ્મ 'લાલો' ના પ્રોડ્યુસર અને એક્ટ્રેસ માનસી પારેખ, પ્રોડ્યુસર પાર્થિવ ગોહિલ કાનમાં સામેલ થશે.
સંસ્કૃતિ અને શ્રદ્ધાનો સંગમ
નિર્માતાઓએ તાજેતરમાં જ ફિલ્મનું એક વિશેષ આમંત્રણ પોસ્ટર સોશિયલ મીડિયા પર પોસ્ટ કર્યું છે, જેમાં 'તમે આમંત્રિત છો' તેવો હાર્દિક સંદેશ પાઠવવામાં આવ્યો છે. આ પોસ્ટરમાં ભગવાન શ્રીકૃષ્ણના પ્રતીક સમાન મોરના પીંછા અને મુગટની આકર્ષક ડિઝાઈન જોવા મળી રહી છે. નિર્માતાઓએ આ પ્રસંગે જણાવ્યું હતું કે, 'આ માત્ર એક સ્ક્રીનિંગ નથી, પરંતુ સંસ્કૃતિ, સિનેમા અને અતૂટ શ્રદ્ધાનો ઉત્સવ છે. અમે ગુજરાતની અસ્મિતાને વૈશ્વિક સ્તરે લઈ જઈ રહ્યા છીએ અને આ ખાસ ક્ષણની ઉજવણીમાં સહભાગી થવું અમારા માટે સન્માનની વાત છે.'
12 મેથી કાન્સ ફેસ્ટિવલનો પ્રારંભ
કાન્સ ઇન્ટરનેશનલ ફિલ્મ ફેસ્ટિવલની 79મી આવૃત્તિ 12 મેના રોજ ફ્રેન્ચ રિવેરા પર 'પેલેસ ડેસ ફેસ્ટિવલ્સ એટ ડેસ કોંગ્રેસ' ખાતે શરૂ થશે. આ વર્ષે ભારતીય સિનેમાનો પ્રભાવ ઘણો મજબૂત જોવા મળી રહ્યો છે. નોંધનીય છે કે, વર્ષ 2024 માં 'ઓલ વી ઈમેજિન એઝ લાઈટ' માટે ગ્રાન્ડ પ્રિકસ જીતનાર ભારતીય ફિલ્મ નિર્માતા પાયલ કાપડિયા આ વખતે 65માં કાન્સ ક્રિટિક્સ વીકની જ્યુરી પ્રેસિડેન્ટ તરીકે સેવા આપશે.
ભારતીય હસ્તીઓની હાજરી
આ વર્ષે બોલિવૂડ અને પ્રાદેશિક સિનેમાના અનેક સ્ટાર્સ કાન્સના રેડ કાર્પેટ પર જોવા મળશે. અભિનેત્રી તારા સુતારિયા એક આંતરરાષ્ટ્રીય બ્રાન્ડનું પ્રતિનિધિત્વ કરીને પોતાનું ડેબ્યૂ કરશે. જ્યારે પંજાબી સુપરસ્ટાર એમી વિર્ક તેમની ફિલ્મ 'ચારદીકલા' ના સ્ક્રીનિંગ માટે રૂપિન્દર કૌર ગિલ સાથે હાજર રહેશે.
આ ઉપરાંત, કાન્સ સાથે લાંબો નાતો ધરાવતા દિગ્દર્શક અનુરાગ કશ્યપ અને અનુભવ સિંહા પણ આ મેળામાં સહભાગી થશે. અનુરાગ કશ્યપની 'ગેંગ્સ ઓફ વાસેપુર' અને 'કેનેડી' જેવી ફિલ્મો અગાઉ અહીં પ્રદર્શિત થઈ ચૂકી છે. આ સાથે જ ઐશ્વર્યા રાય, મૌની રોય અને આલિયા ભટ્ટ પણ રેડ કાર્પેટ પર પહોંચશે.