Laalo Box Office Collection: ગુજરાતી ફિલ્મ ઈન્ડસ્ટ્રીમાં એક નવો ઇતિહાસ રચાયો છે. કરણ જોશી અભિનીત ફિલ્મ 'લાલો - કૃષ્ણ સદા સહાયતે' એ બોક્સ ઓફિસ પર કમાણીના તમામ રેકોર્ડ તોડી નાખ્યા છે. માત્ર 50 લાખના સામાન્ય બજેટમાં બનેલી આ ફિલ્મે ભારતીય બોક્સ ઓફિસ પર અત્યાર સુધીમાં 96.44 કરોડની કમાણી કરી છે, જે રોકાણ સામે અકલ્પનીય 19188% વળતર દર્શાવે છે.
14 અઠવાડિયા અને અવિરત દોડ
આ ગુજરાતી ભક્તિમય ડ્રામા ફિલ્મ હાલમાં સિનેમાઘરોમાં તેના 14મા અઠવાડિયામાં છે. જોકે આ સપ્તાહના અંત સુધીમાં તેની સફર પૂર્ણ થવાની સંભાવના છે, પરંતુ તેણે ગુજરાતી સિનેમાની લગભગ દરેક મોટી સિદ્ધિ પોતાના નામે કરી લીધી છે. ઉલ્લેખનીય છે કે, 9 જાન્યુઆરીના રોજ ફિલ્મનું હિન્દી ડબ વર્ઝન પણ રિલીઝ કરવામાં આવ્યું હતું. જોકે, હિન્દી વર્ઝન માત્ર 37 લાખની કમાણી સાથે નિષ્ફળ રહ્યું છે, પરંતુ મૂળ ગુજરાતી ફિલ્મે ઐતિહાસિક સફળતા મેળવી છે.
ધીમી શરૂઆત બાદ આવી તેજી
'લાલો' 10 ઓક્ટોબર, 2025 ના રોજ રિલીઝ થઈ હતી. શરૂઆતના બે અઠવાડિયા સુધી ફિલ્મની કમાણી અનુક્રમે 33 લાખ અને 27 લાખ સામાન્ય રહી હતી. પરંતુ ત્યારબાદ 'વર્ડ ઓફ માઉથ' એટલે કે દર્શકોની પ્રશંસાને કારણે ફિલ્મની લોકપ્રિયતા જંગલની આગની જેમ ફેલાઈ ગઈ. ત્રીજા અઠવાડિયા પછી ફિલ્મની કમાણીમાં ઉછાળો આવ્યો અને તે ગુજરાતી સિનેમાની સૌથી વધુ કમાણી કરનાર ફિલ્મ બની ગઈ.
95 દિવસનું બોક્સ ઓફિસ ગણિત સેકનિલ્ક (Sacnilk) ના આંકડા મુજબ, 95 દિવસના અંતે ફિલ્મનું કુલ ગણિત નીચે મુજબ છે:
- કુલ નેટ કલેક્શન: 96.44 કરોડ
- ગ્રોસ કલેક્શન: 113.79 કરોડ
- ગુજરાતી વર્ઝન: 96.07 કરોડ
- હિન્દી વર્ઝન: 37 લાખ
- બજેટ: 50 લાખ
- નફો: 95.94 કરોડ
- ROI (વળતર): 19188%