GSEB Class 10 and 12 Marksheet Correction: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા તાજેતરમાં જ ધોરણ 10 અને 12ના પરિણામો જાહેર કરવામાં આવ્યા છે. પરિણામ બાદ અનેક વિદ્યાર્થીઓના મનમાં માર્કશીટમાં નામ, અટક કે જન્મતારીખની ભૂલ અંગે મૂંઝવણ જોવા મળતી હોય છે. માર્કશીટ માત્ર શૈક્ષણિક લાયકાત જ નહીં, પરંતુ જીવનભર માટે ઓળખના મહત્વના દસ્તાવેજ તરીકે કામ કરે છે, તેથી તેમાં રહેલી ક્ષતિઓને વહેલી તકે સુધારી લેવી અનિવાર્ય છે.
સમયમર્યાદા અને ફીનું ધોરણ
આ પણ વાંચો
બોર્ડના સત્તાવાર નોટિફિકેશન અનુસાર, ઓનલાઇન પરિણામ જાહેર થયાના 3 મહિનાની અંદર જો વિદ્યાર્થી સુધારા માટે અરજી કરે, તો કોઈપણ પ્રકારની ફી લીધા વિના ઓરિજિનલ માર્કશીટમાં સુધારો કરી આપવામાં આવશે. જો 3 મહિનાની આ સમયમર્યાદા વીતી જાય, તો બોર્ડ દ્વારા નક્કી કરાયેલી ફી વસૂલવામાં આવશે અને વિદ્યાર્થીને સુધારા સાથેની 'ડુપ્લીકેટ માર્કશીટ' આપવામાં આવશે.
સુધારા માટેની તબક્કાવાર પ્રક્રિયા
- શાળાના રેકોર્ડમાં સુધારો: સૌથી પહેલા શાળાના જનરલ રજિસ્ટર (G.R.) અથવા લિવિંગ સર્ટિફિકેટ (L.C.) માં સુધારો થયેલો હોવો જોઈએ.
- ફોર્મની પસંદગી: ધોરણ 10 અને 12 બંને માટે 'Annexure 4' અને 'Annexure 4A' ફોર્મ ભરવાના રહેશે. જો માત્ર ધોરણ 10 માટે સુધારો કરવાનો હોય, તો 'Annexure 4B' ફોર્મનો ઉપયોગ કરવાનો રહેશે.
- વિગતો: ફોર્મમાં વિદ્યાર્થીએ નામ, શાળાનો ઇન્ડેક્સ નંબર, પરીક્ષાનું વર્ષ, સીટ નંબર અને સરનામું જેવી વિગતો અંગ્રેજીમાં સ્પષ્ટ અક્ષરે ભરવાની રહેશે.
શાળા અને DEO ની મહત્વની ભૂમિકા
આ પ્રક્રિયામાં શાળાના આચાર્યનું ડિક્લેરેશન અને સહી-સિક્કા અનિવાર્ય છે. ખાસ કરીને ધોરણ 10 ની માર્કશીટમાં સુધારા માટે આચાર્યના સહી-સિક્કા ઉપરાંત જિલ્લા શિક્ષણાધિકારી (DEO) ના સિક્કા અને સહી મેળવવા પણ જરૂરી છે. ત્યારબાદ તમામ દસ્તાવેજો ડેપ્યુટી સેક્રેટરી, એક્ઝામિનેશન સ્ટુડન્ટ સર્વિસ સેન્ટર, GSEB, ગાંધીનગર ખાતે મોકલવાના રહેશે.
જરૂરી દસ્તાવેજો
- અસલ માર્કશીટ: જેમાં સુધારો કરવાનો હોય તે ઓરિજિનલ કોપી.
- શાળા છોડ્યાનું પ્રમાણપત્ર (L.C.): આચાર્ય દ્વારા પ્રમાણિત નકલ.
- જન્મનો દાખલો: મ્યુનિસિપલ કોર્પોરેશન કે ગ્રામ પંચાયત દ્વારા જારી કરાયેલ દાખલો.
- સોગંદનામું (Affidavit): જો નામ કે અટક સંપૂર્ણ બદલવાની હોય તો નોટરી કરાવેલું એફિડેવિટ અથવા ગેઝેટની નકલ.
- ઓળખપત્ર: આધાર કાર્ડ કે અન્ય માન્ય ફોટો આઈડી.