Sovereign Gold Bond: સૉવરેન ગોલ્ડ બોન્ડ (SGB)માં રોકાણ કરનારાઓ માટે આ સમાચાર ખુશખબરીથી ઓછા નથી. 2017-18ની સૉવરેન ગોલ્ડ બોન્ડ્સ સિરીઝ XIII તાજેતરમાં મેચ્યોર થઈ છે અને રોકાણકારોએ સોનાના ભાવમાં થયેલા તીવ્ર વધારાનો સંપૂર્ણ લાભ લીધો છે. ભારતીય રિઝર્વ બેંક દ્વારા નક્કી કરાયેલ અંતિમ રિડેમ્પશન કિંમત મુજબ, આ શ્રેણીએ લગભગ 380 ટકાનું સંપૂર્ણ વળતર આપ્યું છે જે ફરી એકવાર સાબિત કરે છે કે SGB ભૌતિક સોના કરતાં વધુ સારો વિકલ્પ છે.
13,563 રુપિયા પર થયું બૉન્ડનું રિડમ્પશન
RBIએ SGB 2017-18 સિરીઝ XIII માટે અંતિમ રિડેમ્પશન કિંમત પ્રતિ યુનિટ રૂ. 13,563 નક્કી કરી. આ બોન્ડ 26 ડિસેમ્બર, 2025ના રોજ મેચ્યોર થયો. તેની કિંમત મેચ્યોરિટી પહેલાના ત્રણ ટ્રેડિંગ દિવસોમાં 999 શુદ્ધતા સોનાના સરેરાશ ભાવ પર આધારિત છે. છેલ્લા આઠ વર્ષમાં સ્થાનિક બજારમાં સોનાના ભાવમાં થયેલો તીવ્ર વધારો આ ઊંચા રિડેમ્પશન ભાવનું સૌથી મોટું કારણ હતું.
SGB કઈ કિંમતે ખરીદવામાં આવ્યા હતા?
જ્યારે આ સૉવરેન ગોલ્ડ બોન્ડ ડિસેમ્બર 2017માં જારી કરવામાં આવ્યા હતા ત્યારે તેની ઇશ્યૂ કિંમત પ્રતિ ગ્રામ રૂ.2,866 રાખવામાં આવી હતી. ઓનલાઈન અરજી કરનારા રોકાણકારોને પણ થોડી છૂટ આપવામાં આવી હતી જેના કારણે તેમને આ બોન્ડ પ્રતિ યુનિટ રૂ. 2,816ના ભાવે મળ્યો હતો. તે સમયે આ કિંમત સામાન્ય રોકાણકારો માટે ખૂબ જ આકર્ષક માનવામાં આવતી હતી.
આ પણ વાંચો
રોકાણકારોને કેટલો ફાયદો થયો ?
જે ઇન્વેસ્ટર્સે આ બૉન્ડને આઠ વર્ષ સુધી જાળવી રાખ્યો તેમણે ફક્ત ભાવ વધારાને કારણે પ્રતિ યુનિટ રૂ. 10,700થી વધુનો નફો મેળવ્યો. જો ટકાવારીની દ્રષ્ટિએ જોવામાં આવે તો, આ લગભગ 380%ના સંપૂર્ણ વળતર બને છે. આ વળતર સંપૂર્ણપણે સોનાના ભાવમાં મજબૂતાઈનું પરિણામ છે.
એટલું જ નહીં SGBની સૌથી મોટી ખાસિયત એ છે કે રોકાણકારોને દર વર્ષે 2.5%નું નિશ્ચિત વ્યાજ પણ મળે છે, જે દર છ મહિને તેમના ખાતામાં જમા થાય છે. જો આ વ્યાજ ઉમેરવામાં આવે તો કુલ વળતર વધુ સારું બને છે.
સોવરેન ગોલ્ડ બોન્ડ શા માટે ખાસ છે?
સોવરેન ગોલ્ડ બોન્ડ ભારત સરકાર દ્વારા જારી કરવામાં આવે છે અને તેનું સંચાલન RBI દ્વારા કરવામાં આવે છે. તેને ભૌતિક સોનાનો સલામત વિકલ્પ માનવામાં આવે છે. આમાં સોનાનો સંગ્રહ કરવાની કોઈ ચિંતા નથી કે તેની શુદ્ધતા અંગે કોઈ જોખમ નથી. રોકાણકારો તેને કાગળ અથવા ડીમેટ સ્વરૂપમાં રાખી શકે છે અને જરૂર પડ્યે તેને એક્સચેન્જ પર પણ વેચી શકે છે.
રિડેમ્પશન સમયે શું થાય છે ?
જે રોકાણકારો બોન્ડને મેચ્યોરિટી સુધી રાખે છે તેમને રિડેમ્પશન રકમ સીધી તેમના રજિસ્ટર્ડ બેંક ખાતામાં મળે છે. સામાન્ય રીતે RBI રોકાણકારોને આ વિશે અગાઉથી જાણ કરે છે. જો કોઈએ બેંક વિગતો અથવા સંપર્ક માહિતી બદલી હોય તો તેને સમયસર અપડેટ કરવી મહત્વપૂર્ણ છે જેથી ચુકવણીમાં વિલંબ ન થાય.
SGBમાં રોકાણ કરતી વખતે ધ્યાનમાં રાખવા જેવા મુદ્દા
SGBમાં સૌથી મોટું જોખમ સોનાના ભાવમાં થતી વધઘટ સાથે સંબંધિત છે. જો પાકતી મુદત સમયે સોનાના ભાવ ઓછા હોય તો વળતર ઓછું હોઈ શકે છે. જોકે લાંબા ગાળે SGB 2017-18 સિરીઝ XIIIએ સાબિત કર્યું છે કે સોનું અને સોવરેન ગોલ્ડ બોન્ડ બંને ધીરજવાન રોકાણકારો માટે અત્યંત ફાયદાકારક સાબિત થઈ શકે છે.