RBI Bulletin: ભારતીય રિઝર્વ બેંક (RBI) દ્વારા જારી કરાયેલા એક સત્તાવાર બુલેટિન અનુસાર દેશના વિદેશી હૂંડિયામણ અનામતના ડેટા દર્શાવે છે કે શુક્રવાર, 19 ડિસેમ્બર, 2025ના રોજ પૂરા થયેલા સપ્તાહ દરમિયાન કેન્દ્રીય બેંકનો અનામત $ 4.37 બિલિયન વધીને $ 693.32 બિલિયનની રેકોર્ડ ઊંચી સપાટીએ પહોંચ્યો છે.
માહિતી અનુસાર 19 ડિસેમ્બર, 2025ના રોજ પૂરા થયેલા સપ્તાહમાં ભારતનો RBI પાસેનો કુલ વિદેશી હૂંડિયામણ ભંડાર 4.37 બિલિયન ડોલર વધીને693.32 બિલિયન ડોલર થયો છે, જે 12 ડિસેમ્બર, 2025ના રોજ પૂરા થયેલા સપ્તાહમાં 688.95 બિલિયન ડોલર હતો.
ANIના તાજેતરના અહેવાલ મુજબ, સપ્ટેમ્બર 2024માં ભારતનું વિદેશી હૂંડિયામણ ભંડાર $704.89 બિલિયનના સર્વકાલીન ઉચ્ચ સ્તરે પહોંચ્યું હતું. છેલ્લા કેટલાક અઠવાડિયામાં, RBIના વિદેશી હૂંડિયામણ ભંડારમાં સતત વધારો થયો છે અને તે રેકોર્ડ ઉચ્ચ સ્તરની નજીક પહોંચી રહ્યો છે.
વિદેશી વિનિમય અનામતમાં વિદેશી ચલણ સંપત્તિ, સોનું, SDR અને આંતરરાષ્ટ્રીય નાણાકીય ભંડોળ (IMF) સાથે દેશની અનામત સ્થિતિનો સમાવેશ થાય છે જે તેની મધ્યસ્થ બેંક દ્વારા જાળવવામાં આવે છે.
જાહેર કરાયેલા આંકડા અનુસાર , 19 ડિસેમ્બર, 2025ના રોજ પૂરા થયેલા સપ્તાહ દરમિયાન આરબીઆઈની વિદેશી ચલણ સંપત્તિ 1.65 અબજ ડોલર વધીને 559.43 અબજ ડોલર થઈ છે જે અગાઉના સપ્તાહમાં 557.78 અબજ ડોલર હતી.
આરબીઆઈનું ગોલ્ડ ફંડ
વિશ્વભરની કેન્દ્રીય બેંકો ભૂરાજકીય અથવા સ્થાનિક આર્થિક અનિશ્ચિતતાના સમયમાં નાણાકીય સુરક્ષા અને સ્થિરતા પ્રદાન કરવા માટે ચોક્કસ માત્રામાં સોનાનો ભંડાર એકઠો કરે છે. સોનું રાખતી સંસ્થાઓ દેશના ચલણને ટેકો પૂરો પાડે છે અને એકંદર વિદેશી વિનિમય અનામતમાં પણ ફાળો આપે છે.
19 ડિસેમ્બર, 2025ના રોજ પૂરા થયેલા સપ્તાહમાં RBIનો સોનાનો ભંડાર 2.62 બિલિયન ડોલર વધીને 110.36 બિલિયન ડોલર થયો છે, જે અગાઉના સપ્તાહમાં 107.74 બિલિયન ડોલર હતો.
સોના ઉપરાંત વિદેશી વિનિમય અનામતના બે અન્ય પાસાઓ છે જે કુલ વિદેશી વિનિમય અનામતમાં ફાળો આપે છે. SDR અને આંતરરાષ્ટ્રીય નાણાકીય ભંડોળ (IMF)માં રાખવામાં આવેલ અનામત એ RBIના અનામતમાં બે વધારાની વસ્તુઓ છે જે દેશના અનામતમાં ફાળો આપે છે.
અન્ય વિદેશી હૂંડિયામણ અનામત
બુલેટિનમાં જણાવાયું છે કે આરબીઆઈના સ્પેશિયલ ડ્રોઈંગ રાઈટ્સ (SDR) 10 મિલિયન ડોલર વધીને 18.74 અબજ ડોલર થયા છે જે પાછલા અઠવાડિયામાં 18.73 અબજ ડોલર હતા.
19 ડિસેમ્બર, 2025ના રોજ પૂરા થયેલા સપ્તાહમાં આંતરરાષ્ટ્રીય નાણાકીય ભંડોળ (IMF) ખાતે કેન્દ્રીય બેંકની અનામત સ્થિતિ લગભગ $ 96 મિલિયન વધીને $ 4.782 બિલિયન થઈ ગઈ છે, જે 12 ડિસેમ્બર, 2025ના રોજ પૂરા થયેલા સપ્તાહમાં $ 4.686 બિલિયન હતી.