Electric Scooter Subsidy Gujarat 2026: વધતી જતી મોંઘવારી વચ્ચે વાહનચાલકોને ફરી એકવાર મોટો ઝટકો લાગ્યો છે. ઓઈલ માર્કેટીંગ કંપનીઓએ પેટ્રોલ અને ડીઝલના ભાવમાં ₹3થી વધુનો મોટો વધારો ઝીંકી દીધો છે. આ ભાવવધારા બાદ અમદાવાદમાં પેટ્રોલનો ભાવ વધીને ₹97.43 થી ₹97.49 પ્રતિ લિટર ની આસપાસ પહોંચી ગયો છે, જ્યારે ગુજરાતના અન્ય શહેરોમાં પણ સરેરાશ ભાવ ₹97.50 ને પાર થઈ ગયા છે. જો તમે પણ પેટ્રોલના ખર્ચથી કંટાળીને નવું ઇલેક્ટ્રિક સ્કૂટર ખરીદવાનું વિચારી રહ્યા છો, તો સરકારના નવા નિયમો અને સબસિડી વિશે ખાસ જાણી લો.
કેન્દ્ર સરકારની PM E-DRIVE યોજના: જુલાઈ 2026 સુધી વધી મુદત
કેન્દ્ર સરકાર દ્વારા ઇલેક્ટ્રિક વાહનોને પ્રોત્સાહન આપવા માટે શરૂ કરાયેલી PM E-DRIVE (PM Electric Drive Revolution in Innovative Vehicle Enhancement) યોજનાની મુદત ઇલેક્ટ્રિક ટૂ-વ્હીલર્સ માટે લંબાવીને 31 જુલાઈ 2026 કરવામાં આવી છે.
નિયમ: આ યોજના હેઠળ પ્રતિ kWh પર ₹2,500 ની સબસિડી મળે છે.
મહત્તમ લિમિટ: વાહન દીઠ કુલ સબસિડી ₹5,000 સુધી મર્યાદિત રાખવામાં આવી છે.
શરત: આ લાભ માત્ર ₹1.5 લાખથી ઓછી એક્સ-ફેક્ટરી કિંમત ધરાવતા અને એડવાન્સ લિથિયમ-આયન બેટરીવાળા સ્કૂટર પર જ મળશે. આધાર કાર્ડ આધારિત e-KYC દ્વારા શોરૂમ પર જ આ ડિસ્કાઉન્ટ સીધું બિલમાંથી બાદ મળી જાય છે.
ગુજરાત સરકારના બેવડા લાભ: વિદ્યાર્થીઓ અને શ્રમિકો માટે સ્પેશિયલ સ્કીમ
ગુજરાત રાજ્યમાં ડાયરેક્ટ ખરીદી પરની સામાન્ય સબસિડીઓ મર્યાદિત કરાઈ છે, પરંતુ ચોક્કસ વર્ગો માટે ખાસ યોજનાઓ ચાલુ છે:
વિદ્યાર્થીઓ માટે (GEDA Scheme): ગુજરાતના ધોરણ-12 કે કોલેજના વિદ્યાર્થીઓ GEDA પોર્ટલ દ્વારા ઇલેક્ટ્રિક બાઇક ખરીદવા પર નિયમોને આધીન ₹12,000 ની ફ્લેટ સબસિડી મેળવી શકે છે. આમાં કોઈ કૌટુંબિક આવક મર્યાદા નથી.
શ્રમિકો માટે 'ગો ગ્રીન યોજના': જો તમે ગુજરાતના કારખાના કે સંસ્થામાં કામ કરતા રજિસ્ટર્ડ શ્રમિક છો, તો સરકાર ખરીદ કિંમતના 30% અથવા મહત્તમ ₹30,000 સુધીની સબસિડી સીધી બેંક ખાતામાં આપે છે.
RTO ટેક્સમાં 5%નો સીધો ફાયદો
ગુજરાત સરકારના બજેટના લેટેસ્ટ નિયમ પ્રમાણે, રાજ્યમાં ઇલેક્ટ્રિક વાહનોના વેચાણને વેગ આપવા માટે મોટર વ્હીકલ ટેક્સ (RTO Tax) 6% થી ઘટાડીને માત્ર 1% કરી દેવામાં આવ્યો છે. એટલે કે વાહન ખરીદતી વખતે સીધી 5% ની બચત ઓન-રોડ પ્રાઇસમાં જોવા મળશે.
કઈ બ્રાન્ડ્સના મોડલ સબસિડી માટે પાત્ર છે?
હાલમાં એડવાન્સ લિથિયમ બેટરી અને સરકારી નિયમો (FAME/PM E-DRIVE) હેઠળ માન્યતા પ્રાપ્ત ટોચની કંપનીઓ આ મુજબ છે:
- OLA Electric: Ola S1 X, Ola S1 Air, Ola S1 Pro
- TVS Motor: TVS iQube, TVS iQube ST
- Ather Energy: Ather 450X, Ather Rizta
- Bajaj Auto: બજાજ ચેતક (Chetak)
- Hero Vida: Vida V1 Plus અને Pro મોડલ્સ