India Exports Growth August 2026: વૈશ્વિક સ્તરે ભૌગોલિક-રાજકીય તણાવ અને અમેરિકા દ્વારા લાદવામાં આવેલા નવા ટેરિફ છતાં ભારતીય નિકાસકારોએ વિદેશી બજારોમાં શાનદાર પ્રદર્શન જાળવી રાખ્યું છે. વાણિજ્ય મંત્રાલય દ્વારા જાહેર કરવામાં આવેલા નવા આંકડા અનુસાર, ઓગસ્ટ 2026 દરમિયાન અમેરિકા, ચીન અને સિંગાપોર જેવા મુખ્ય વૈશ્વિક બજારોમાં ભારતની નિકાસમાં નોંધપાત્ર વૃદ્ધિ નોંધાઈ છે.
અમેરિકા અને ચીનમાં નિકાસનો નવો રેકોર્ડ
અમેરિકાએ 24 જુલાઈથી ભારત પર વધારાનો 10% ટેરિફ લાદ્યો હોવા છતાં, ત્યાં ભારતીય ચીજવસ્તુઓની માગમાં ભારે ઉછાળો આવ્યો છે. ઓગસ્ટમાં અમેરિકામાં ભારતની નિકાસ વાર્ષિક ધોરણે 21.83% વધીને $8.4 અબજ સુધી પહોંચી ગઈ છે. બીજી તરફ, ચીનમાં નિકાસ 52.35% વધીને $1.9 અબજ થઈ હતી.
આ સાથે જ બંને દેશોમાંથી ભારતની આયાતમાં પણ મોટો વધારો થયો છે. ઓગસ્ટમાં ચીનથી આયાત 17% વધીને $12.77 અબજ અને અમેરિકાથી આયાત 65.78% વધીને $5.97 અબજ નોંધાઈ હતી. ચાલુ નાણાકીય વર્ષ (2026-27) ના પ્રથમ પાંચ મહિના (એપ્રિલ-ઓગસ્ટ) દરમિયાન અમેરિકામાં કુલ નિકાસ $42.8 અબજ અને ચીનમાં $9.64 અબજ પહોંચી છે.
સિંગાપોર બન્યું સરપ્રાઈઝ ફેક્ટર
ઓગસ્ટના આંકડાઓમાં સિંગાપોર સૌથી મોટું આશ્ચર્યજનક પરિબળ બનીને ઉભર્યું છે. ઓગસ્ટમાં સિંગાપોરમાં ભારતની નિકાસ વાર્ષિક ધોરણે 160.96% ના તોતિંગ વધારા સાથે $1.9 અબજ થઈ હતી. આ સિવાય જર્મની, દક્ષિણ આફ્રિકા, તાંઝાનિયા, ઓસ્ટ્રેલિયા, મલેશિયા, શ્રીલંકા અને ઈટાલીમાં પણ ભારતીય નિકાસ વધી છે.
UAE માં નિકાસ ઘટી, આયાતમાં નવો વળાંક
પશ્ચિમ એશિયામાં સર્જાયેલી રાજકીય કટોકટીના કારણે સંયુક્ત આરબ અમીરાત (UAE) માં થતી નિકાસ 26.1% ઘટીને $2.4 અબજ થઈ ગઈ હતી. બીજી તરફ, ઓગસ્ટ દરમિયાન ઓમાનમાંથી આયાત 157.45% ($1.64 અબજ), તાઈવાનથી 108.31% ($1.6 અબજ) અને બ્રાઝિલથી 132% ($1.12 અબજ) વધી છે.