GST Council Meeting New Date: દેશમાં ગુડ્સ એન્ડ સર્વિસ ટેક્સ (GST) સંબંધિત નીતિવિષયક નિર્ણયો લેતી સર્વોચ્ચ સંસ્થા 'GST કાઉન્સિલ'ની 57મી બેઠકના શિડ્યુલમાં મહત્વનો ફેરફાર કરવામાં આવ્યો છે. પૂર્વ નિર્ધારિત કાર્યક્રમ મુજબ આ બેઠક 7 ઓક્ટોબરે યોજાવાની હતી, પરંતુ હવે અનિવાર્ય કારણોસર તેને એક દિવસ માટે લંબાવવામાં આવી છે. આ બેઠક હવે 8 ઓક્ટોબરના રોજ નવી દિલ્હી સ્થિત ભારત મંડપમના સમિટ રૂમમાં સવારે 11:00 વાગ્યાથી યોજાશે.
ઓફિસ મેમોરેન્ડમ દ્વારા તારીખ લંબાવવાની સત્તાવાર ટાંચણ
GST કાઉન્સિલ સચિવાલય દ્વારા જારી કરવામાં આવેલા સત્તાવાર ઓફિસ મેમોરેન્ડમ અનુસાર, અનિવાર્ય સંજોગોને ધ્યાનમાં રાખીને બેઠકની તારીખમાં આ ફેરફાર કરાયો છે. આ મેમોરેન્ડમ મહેસૂલ સચિવની મંજૂરીથી જારી કરવામાં આવ્યું છે, જેઓ GST કાઉન્સિલના એક્સ-ઓફિશિયો સેક્રેટરી તરીકે પણ ફરજ બજાવે છે. સચિવાલય દ્વારા તમામ રાજ્યોના નાણાં મંત્રીઓ, કેન્દ્રશાસિત પ્રદેશોના પ્રતિનિધિઓ અને કાઉન્સિલના તમામ સભ્યોને સમયપત્રકમાં થયેલા આ ફેરફાર અંગે સમયસર જાણ કરી દેવામાં આવી છે. ઉલ્લેખનીય છે કે, અગાઉ BRICS કોન્ફરન્સ જેવા મહત્વના વૈશ્વિક આયોજનોને કારણે પણ બેઠકના સમયપત્રકમાં ફેરફાર કરવો પડ્યો હતો.
નાણામંત્રી નિર્મલા સીતારમણની અધ્યક્ષતામાં યોજાશે બેઠક
કેન્દ્રીય નાણામંત્રી નિર્મલા સીતારમણની અધ્યક્ષતામાં યોજાનારી આ બેઠકમાં દેશના તમામ રાજ્યો અને કેન્દ્રશાસિત પ્રદેશોના નાણામંત્રીઓ તેમજ વરિષ્ઠ અધિકારીઓ ઉપસ્થિત રહેશે. લગભગ એક વર્ષ કરતાં પણ વધુ સમયના લાંબા અંતરાલ બાદ યોજાઈ રહેલી આ કાઉન્સિલ મીટિંગ ખૂબ જ મહત્વપૂર્ણ માનવામાં આવી રહી છે, કારણ કે તેમાં વેપારીઓ, કરદાતાઓ અને સામાન્ય જનતાને સ્પર્શતા અનેક જીએસટી સંબંધિત વિષયો પર ચર્ચા-વિચારણા હાથ ધરવામાં આવશે.
જીએસટી દરો અને સ્લેબમાં અગાઉ કરાયા હતા મોટા સુધારા
આ અગાઉ GST કાઉન્સિલની 56મી બેઠક 3 અને 4 સપ્ટેમ્બર 2025ના રોજ યોજાઈ હતી. જેમાં કેન્દ્ર અને રાજ્ય સરકારોએ મળીને જીએસટીના દરો અને સ્લેબના માળખામાં અત્યાર સુધીનો સૌથી મોટો ફેરફાર કરવાનો ઐતિહાસિક નિર્ણય લીધો હતો.
તે નિર્ણયના અમલીકરણરૂપે 22 સપ્ટેમ્બર 2025 થી, 1 જુલાઈ 2017 થી અમલમાં રહેલા જુના ચાર સ્લેબ (5%, 12%, 18% અને 28%) ને બદલે સરળ બે-સ્તરીય માળખું (5% અને 18%) લાગુ કરવામાં આવ્યું હતું. આ સિવાય, અલ્ટ્રા-લક્ઝરી વસ્તુઓ અને Sin Goods માટે 40% નો ટોચનો દર નક્કી કરવામાં આવ્યો હતો. હવે યોજાનારી 57મી બેઠકમાં આ નવા ટેક્સ માળખાના અમલીકરણની સમીક્ષા અને અન્ય વહીવટી પ્રક્રિયાઓ પર મહત્વના નિર્ણયો લેવાય તેવી સંભાવના છે.