Russian Oil: મિત્તલ ગ્રુપ અને હિન્દુસ્તાન પેટ્રોલિયમ કોર્પોરેશન લિમિટેડ (HPCL) વચ્ચેના સંયુક્ત સાહસ HMELએ બુધવારે જણાવ્યું હતું કે તાજેતરના પ્રતિબંધોને ધ્યાનમાં રાખીને તેણે રશિયા પાસેથી ક્રૂડ ઓઇલ ખરીદવાનું બંધ કરવાનો નિર્ણય લીધો છે.
મુખ્ય રશિયન તેલ ઉત્પાદકો પર યુએસ પ્રતિબંધો બાદ HMELએ સત્તાવાર રીતે કહ્યું છે કે તે રશિયા પાસેથી ક્રૂડ ઓઇલ ખરીદશે નહીં. HPCL-મિત્તલ એનર્જી લિમિટેડ (HMEL)એ જણાવ્યું હતું કે તેણે અત્યાર સુધી સપ્લાય-સાઇડ ધોરણે રશિયા પાસેથી ઓઈલ ખરીદ્યું છે.
તેનો અર્થ એ થયો કે સપ્લાયરે જળ પરિવહનની વ્યવસ્થા કરી હતી. આ પુરવઠા માટે ભારતીય બંદરો પર આવતા તમામ જહાજો કોઈપણ પરવાનગી વગર હતા. કંપનીએ વધુમાં જણાવ્યું હતું કે US, EU અને UK દ્વારા રશિયાથી ક્રૂડ ઓઇલની આયાત પર નવા પ્રતિબંધોની જાહેરાત બાદ HMELએ રશિયા પાસેથી ક્રૂડ ઓઇલની વધુ ખરીદી બંધ કરવાનો નિર્ણય લીધો છે.
પંજાબના ભટિંડામાં ઓઇલ રિફાઇનરી ધરાવતી અને તેનું સંચાલન કરતી આ કંપનીએ જણાવ્યું હતું કે તેણે હંમેશા સરકારી નીતિઓ અને નિયમોનું સંપૂર્ણ પાલન કર્યું છે. HMELની વ્યવસાયિક પ્રવૃત્તિઓ ભારત સરકાર અને તેની ઊર્જા સુરક્ષા નીતિ સાથે સુસંગત છે.
ઇન્ડિયન ઓઇલ કોર્પોરેશન પણ રશિયન તેલ ખરીદશે નહીં
ઇન્ડિયન ઓઇલ કોર્પોરેશન (IOC) એ સોમવારે જણાવ્યું હતું કે તે તમામ લાગુ આંતરરાષ્ટ્રીય પ્રતિબંધોનું પાલન કરશે.એપ્રિલ અને સપ્ટેમ્બર 2025 દરમિયાન IOC ની કુલ ક્રૂડ ઓઇલ આયાતમાં રશિયન તેલનો હિસ્સો 21% હતો. જોકે US પ્રતિબંધો પછી પરિસ્થિતિ બદલાઈ રહી છે. IOCની પેટાકંપની ચેન્નાઈ પેટ્રોલિયમ કોર્પોરેશન લિમિટેડ (CPCL)એ આ મહિને તેની રશિયાથી ઓઈલની આયાત અડધી કરી દીધી છે.
અમેરિકાએ 22 ઓક્ટોબરે રશિયન તેલ કંપનીઓ રોઝનેફ્ટ (Rosneft)અને લુકોઇલ(Lukoil) પર પ્રતિબંધો લાદ્યા હતા, ત્યારબાદ યુરોપિયન યુનિયને બીજા દિવસે બંને કંપનીઓ સાથેના વ્યવહારો પર સંપૂર્ણ પ્રતિબંધ મૂક્યો હતો.